قازاقستانداعى پرەزيدەنتتىك سايلاۋ ەكى رەكورد ورناتتى - ساياساتتانۋشى
«الدىمەن، سايلاۋعا كەلۋشىلەر دەڭگەيىنىڭ جوعارى بولعانىن ايتۋعا بولادى. بۇل پوستكەڭەستىك ەلدەر ىشىندە جالپى بۇكىل الەمدەگى ەڭ ۇزدىك كورسەتكىش. سايلاۋ كوميسسيالارى مەن ۇمىتكەرلەردىڭ شتابتارىنىڭ ەلەكتوراتتىڭ بەلسەندىلىگىن ارتتىرۋ ماقساتىندا جۇرگىزگەن جۇمىستارىنىڭ ناتيجەلى بولعانىن، ەلەكتورات بەلسەندىلىگىنىڭ، ونىڭ ازاماتتىق ۇستانىمىنىڭ جوعارى بولعانىن كورسەتتى»، - دەپ اتاپ ءوتتى ول.
ساياساتتانۋشىنىڭ سوزىنە قاراعاندا، بۇل كورسەتكىشتەر قازاقستان ءۇشىن رەكوردتى.
«ەكىنشىدەن، exit poll جاريالاعان مالىمەت بويىنشا 97 پايىزدان استام داۋىس جيعان ەلباسىنىڭ جەڭىسكە جەتۋى ەل تۇرعىندارى وزدەرىنىڭ ءۇمىتىن ونىڭ الداعى قىزمەتىمەن بايلانىستىراتىنىن ايعاقتايدى. تۇرعىندار قازاقستاننىڭ تاۋەلسىزدىك جىلدارى قول جەتكىزگەن جەتىستىكتەرىن جوعارى باعالايدى. بۇل ۇلتارالىق كەلىسىم، ساياسي تۇراقتىلىق، ەكونوميكالىق رەفورمالار مەن الەۋمەتتىك قامتۋدىڭ جوعارى كورسەتكىشى. مەنىڭ ويىمشا، تۇرعىنداردىڭ مەملەكەت باسشىسىنىڭ جاڭا باعدارلاماسىن قولداۋىنا قاراعاندا، ەل بولاشاعىن وزگەرىسسىز، ارتقا شەگىنبەي، كەرىسىنشە العا جىلجۋىن قالايدى. بارلىعىمىزدى بۇل جەڭىسپەن قۇتتىقتاۋعا بولادى دەپ ويلايمىن»، - دەدى د. اشىمبايەۆ.
اۆتور: قانات مامەتقازى ۇلى
