بيىلعى ەۋروپا قازاقتارىنىڭ قۇرىلتايى قىتايدان شىققان ەلىسحان باتىردىڭ رۋحىنا ارنالادى
23-24- مامىر كۇندەرى نيدەرلاندىنىڭ استاناسىندا وتەتىن قۇرىلتايدا گەرمانيا، فرانسيا، شۆەتسيا، اۆستريا، بريتانيا، نورۆەگيا، دانيا جانە شۆەيتساريادان وزگە امەريكا جانە تۇركيادا تۇراتىن قازاقتار دا باس قوسپاق.
بۇل جولعى القالى باسقوسۋ قىتايدان انادولىعا اۋىپ، ارى قاراي ەۋروپا ەلدەرىنە تاراعان قازاقتىڭ كوشىن باستاعان، شىڭجاڭ قازاقتارىنىڭ ۇلت-ازاتتىق كۇرەسى باسشىلارىنىڭ ءبىرى ەلىسحان ءالىپ ۇلىنىڭ رۋحىنا ارنالادى.
قۇرىلتاي كەزىندە جىلداعىداي كولەمدى فۋتبول تۋرنيرى ءوتىپ، بالالارعا ارنالعان جارىستار ۇيىمداستىرىلاتىن بولادى. سونداي-اق، ەۋروپا قازاق قوعامدارى فەدەراتسياسىنىڭ (FEKA) جينالىسى ءوتىپ، ەۋروپادا تۇراتىن قازاقتاردىڭ بۇگىنگى تاڭدا ءدوپ كەلىپ وتىرعان ءتىل جانە مادەنيەت جاعىنداعى ماسەلەلەرى حالىقارالىق دوڭگەلەك ۇستەلدە تالقىلاناتىن بولادى.
ايتا كەتەيىك، ەۋروپانىڭ ءار ەلىندە بىتىراي قونىستانعان قازاقتاردىڭ باسىن قوسۋ، سونىڭ ىشىندە قازاق جاستارىنىڭ انا ءتىلى، ۇلتتىق ءداستۇرىن ساقتاۋىنا جانە ءوزارا قارىم-قاتىناستارىن نىعايتۋىنا جول اشۋ ءۇشىن ۇيىمداستىرىلىپ كەلە جاتقان قۇرىلتاي ەڭ العاش رەت 2002-جىلى گەرمانيانىڭ كەلن قالاسىندا وتكەن بولاتىن.
