ەلباسى: ەڭ ءبىرىنشى العىسىم حالقىما ارنالادى

استانا. قازاقپارات - بۇگىن استانادا ءوتىپ جاتقان جەڭىمپازدار فورۋمىندا ءسوز سويلەگەن ق ر پرەزيدەنتى نۇرسۇلتان نازاربايەۆ بارشا قازاقستاندىقتارعا سايلاۋداعى قولداۋى ءۇشىن العىسىن ءبىلدىردى.

«قۇرمەتتى حالقىم! قازاقستاندىقتار! بۇگىن ەلىمىز ءۇشىن تاعى ءبىر ۇمىتىلماس تاريحي كەزەڭ بولدى. وزدەرىڭىزگە بەلگىلى، جاڭا عانا ورتالىق سايلاۋ كوميسسياسىنىڭ مالىمدەمەسى بولدى. ەلىمىزدىڭ 95 پايىزدان ارتىق سايلاۋشىلارى قاتىسقان شارادا ماعان 97,7 پايىز داۋىس بەردى. ەڭ ءبىرىنشى العىسىم - حالقىما. مەنىڭ جۇرتىم وسى جىلداردىڭ بارلىعىندا قولداپ، مەنىڭ ارتىمنان ەرىپ، شىلبىر مەن تىزگىندى ءبىر قولىما ۇستاتىپ، سەنىپ كەلە جاتقان وتانداستارىمنىڭ جاپپاي سەنىمىن ورىنداۋ قادىرمەندى مىندەت. وسى مىندەتتى اتقارۋ ءۇشىن ءوزىمنىڭ كۇش- جىگەرىمدى، دەنساۋلىعىمدى، تاجىريبەمدى اياماي قىزمەت ەتە بەرمەكپىن دەپ انت بەرگەنمىن. مەن سول انتتى ورىنداپ كەلە جاتىرمىن»، - دەدى ن. نازاربايەۆ.

سونىمەن قاتار ەلباسى سايلاۋدى وتكىزۋگە بەلسەندىلىك تانىتقان «نۇر وتان» پارتياسىنىڭ مۇشەلەرىنە، قوعامدىق كوميسسيا مۇشەلەرىنە، 10 مىڭنان استام شتاب مۇشەلەرىنە العىسىن جەتكىزدى.

«ولار مەنىڭ باعدارلامامدى حالىققا ءتۇسىندىردى. بارشالارىنا شىن جۇرەكتەن العىس ايتامىن. بەلسەندى قاتىسقان جاستارعا دا ريزاشىلىعىمدى بىلدىرەمىن. بارلىق ىستەلىپ جاتقان شارۋانى قازاقستاننىڭ بولاشاعى مىعىم، تاۋەلسىزدىگىمىزدىڭ تۇعىرى بيىك بولۋى ءۇشىن، ماڭگىلىك بولۋى ءۇشىن ىستەپ جاتىرمىز. بۇل جاستار ءۇشىن، بولاشاق ءۇشىن! ولار وتانىن ءسۇيىپ، ەلى ءۇشىن قىزمەت ەتەدى دەپ سەنەمىن»، - دەدى مەملەكەت باسشىسى.

اۆتور: قانات مامەتقازى ۇلى