ەركىن ەسكى اندەردى جاڭعىرتتى- فوتو، كەسكىن
ەركىن ءوزىنىڭ ءان كەشىن «انا قادىرى» دەپ اتاپتى. ەركىننىڭ جەكە كونسەرتىنە قاتىسقان قازاق ەستراداسىنىڭ جۇلدىزدارى، كورەرمەندەر الەۋمەتتىك جەلىلەرگە كەش تۋرالى پىكىرلەرىن جازىپ، سۋرەتتەرىمەن بولىسۋدە. بۇگىن ەركىننىڭ حالىق كوڭىلىنەن شىققان اندەرىن نازارلارىڭىزعا ۇسىنىپ وتىرمىز.
سايدىڭ تاسىنداي «جىگىتتەر» توبىنان ءبولىنىپ شىققان ەركىن جەكە ءانشى رەتىندە كورەرمەننىڭ كوڭىلىنەن شىقتى. ءسوزى ماعىنالى، اۋەزدى اندەردى ورىندايتىن ءانشىنىڭ كورەرمەنى كوپ ەكەنى كەشكە جينالعان حالىقتىڭ قاراسىنان-اق بەلگىلى.
ەركىننىڭ اندەرىن كورەرمەن ساعىنىپ قالىپتى. العاش رەت الماتى قالاسىندا جەكە كونسەرتىن حالىققا تارتۋ ەتكەن ءانشىنىڭ ادەمى ءان كەشىنە جانەل نۇرجانوۆا، باعلان ءابدىرايىموۆ، قايرات نۇرتاس، تورەعالي تورەالى جانە نۇرجان تولەنديەۆ سىندى ونەر يەلەرى قاتىستى.
وزىنە ءتان قوڭىر داۋسىمەن، سالماقتى مىنەزىمەن باسقالاردان ەرەكشەلەنەتىن ءانشىنىڭ مىنەزى رەپەرتۋارىنان دا كورىنىس بەرىپ تۇراتىنداي. داۋىسىنداعى ادەمى بوياۋىنىڭ ارقاسىندا بولسا كەرەك، مۇڭدى اندەردى حالىقتىڭ جۇرەگىنە جەتكىزە ورىندايتىن ەركىن نۇرجانوۆ ءوزىن مۇڭدى ادام دەپ ەسەپتەمەيدى، ول كوڭىلدى اندەردى دە شىرقايدى. دەگەنمەن ەركىننىڭ انا تۋرالى، ماحاببات تۋرالى مۇڭدى اندەرىن تىڭدارمان وتە جىلى قابىلدايدى. ەركىن تەك ءانشى عانا ەمەس، اقىندىعى دا، سازگەرلىگى دە بار. كونسەرت بارىسىندا ول ءوزى جازعان اندەردى دە ورىندادى.
اقيىق اقىن مۇقاعالي ماقاتايەۆتىڭ «كەلشى قالقام شاشىڭنان يىسكەيىن» دەگەن ءانى ەركىننىڭ رەپەرتۋارىنداعى ەڭ تاماشا اندەردىڭ ءبىرى. ەركىننىڭ ءان كەشىنە وسى ءاننىڭ كەيىپكەرى دە كەلىپتى. مۇقاعاليداي اقىن ءان ارناعان سۇلۋ قىز بۇگىندە ساليقالى اجەگە اينالىپتى. ءان كەيىپكەرىنىڭ سۋرەتىن الەۋمەتتىك جەلىگە بەلگىلى جۋرناليست ءاليا قۇدايبەرگەنوۆا جاريالادى.
ەركىن نۇرجانوۆ ءوزىنىڭ ءان كەشىندە ونەردەگى دوستارى قايرات نۇرتاسپەن، تورەعالي تورالىمەن، باعلان ابدرايموۆپەن دۋەت ورىندادى. ءوزىنىڭ رەپەرتۋارىنداعى اندەرمەن قوسا ءان كەشىندە جاڭا اندەردىڭ تۇساۋى كەسىلدى. ەركىن حالىقتىڭ جانىدا ساقتالعان ەسكى اندەردى دە جاڭعىرتتى. ءان كەشىندە ەركىن ورىنداعان اندەردى تىڭداي وتىرىڭىزدار.
اۆتور: اينۇر نۇرسابەت
«الاش ايناسى»
