ءانشى، سازگەر، اقىن ارمان دۇيسەنوۆ بالالارىن قالاي تاربيەلەيدى؟ - كەسكىن

استانا. قازاقپارات - شوۋ-بيزنەستە دە، تەلەۆيزيا سالاسىندا دا ماڭداي تەرىن توگىپ، بارلىق ىنتا-شىنتاسىمەن ەڭبەكتەنەتىن جاندار ەكەۋ بولسا، سونىڭ ءبىرى، بىرەۋ بولسا، سونىڭ ءوزى - ارمان دۇيسەنوۆ.

ءانشى، سازگەر، اقىن، اسابا، تەلەجۇرگىزۋشى، پروديۋسەر ارمان دۇسەنوۆتى سەگىز قىرلى ەمەس سەكسەن قىرلى، ءبىر سىرلى دەسەك تە قاتەلەسپەيمىز. ارماندى حالىق ونەرلى ازامات رەتىندە جاقسى تانيدى.

ال ارمان وتباسىندا قانداي جار، قانداي اكە؟ جاقىندا ارمان اعانىڭ «جۇلدىزدى شاڭىراق» باعدارلاماسىنا بەرگەن سۇقباتىنان ونىڭ ءبىراز ەرەكشەلىگىن وزىمىزگە ءتۇيىپ الدىق. «الاش ايناسى» وقىرماندارىنا ارمان دۇيسەنوۆ جايلى قىزىقتى دەگەن دەرەكتەردى ۇسىنىپ وتىرمىز.

ارمان دۇيسەنوۆتىڭ ايسۇلۋ اتتى جارى، اراي اتتى قىزى، ابىلاي جانە ابزال اتتى ۇلدارى بار.

ارمان دۇيسەنوۆ 1974 -جىلى 4 -مامىردا مۋزىكانتتار وتباسىندا دۇنيەگە كەلگەن. اكەسى مەن اناسى دا ءوز كەزىندە ورال وڭىرىنە تانىمال مۋزىكانتتار بولدى.

«ەرتە تۇرعان ەركەكتىڭ ىرىسى ارتىق...» دەمەكشى، ارمان مىرزا ەرتە تۇرادى. بۇل دا ەڭبەكقور ادامعا ءتان قاسيەت بولسا كەرەك. سوندىقتان دا بولار ارمان دۇيسەنوۆ بارىنە ۇلگەرەدى.

ارمان مەن ايسۇلۋدىڭ بالالارى اراي مەن ابىلاي كاراتەمەن اينالىسادى ەكەن. ال كەنجەسى ابزال 3 جاستا. ازىرگە اتا-اناسى كەنجەلەرىن پاتشاسىنداي سىيلايتىندارىن ايتادى.

ارمان سۇيىكتى جارى ايسۇلۋعا جانە اناسىنا ەشقانداي سەبەپسىز گۇل سىيلاپ تۇرادى. ايتپاقشى، ايسۇلۋ حانىم كەنتاۋ قالاسىندا تۋىپ-وسكەن. ارمان مەن ايسۇلۋدىڭ وتاسقانىنا 17 جىل.

ارمان دۇيسەنوۆتىڭ بالالارى اكەلەرىنىڭ قاتال ەمەستىگىن ايتادى. ارمان دۇيسەنوۆتىڭ بالا تاربيەسىندەگى ۇستانىمى: 5 جاسقا دەيىن بالاڭدى پاتشاڭداي سىيلا، 5 جاستان 15 جاسقا دەيىن قۇلىڭداي جۇمسا، 15 جاستان ارى قاراي دوسىڭداي سىرلاس. ارمان دۇيسەنوۆ بالالارىنا ماماندىق تاڭداۋدى ءوز ەرىكتەرىنە بەرگەن دۇرىس دەپ ەسەپتەيدى.

«بەس ساۋساق بىردەي ەمەس. بالالارىمنىڭ ءارقايسىسىنىڭ ءوزىنىڭ مىنەزى، ءومىر ءسۇرۋ تەمپى بار. كوپ ادام ءوز بالالارىنان ءوزىن كورىگىسى كەلەدى. ءوزىنىڭ قولىنان كەلەتىن نارسە بالالارىنىڭ قولىنان دا كەلۋ كەرەك دەپ ەسەپتەيدى. مەنىڭشە بۇل ۇلكەن قاتەلىك سياقتى. ويتكەنى ءار ادام اللا تاعالانىڭ ەرەكشە جاراتىلىسى. ءتىپتى بالاڭنىڭ بويىندا بار قاسيەت وزىڭدە بولماۋى مۇمكىن. ايتالىق مەنىڭ بالالارىمنىڭ سپورتقا دەگەن ىنتاسى ەرەكشە، بۇل مەندە جوق قاسيەت. مەنىڭ بالالارىم قانداي دا ءبىر جەتىستىككە جەتسە، تانىمال اكەسىنىڭ ارقاسى دەۋى مۇمكىن جۇرت. مەن سوندىقتان بالالارىمدى ايايمىن. سوندىقتان دا ولار مىقتى بولۋى ءتيىس»، - دەيدى ارمان دۇيسەنوۆ.

ارمان دۇيسەنوۆ تاياۋدا عانا قازاق ونەرىنىڭ قارا شاڭىراعى، ونەر مايتالماندارىنىڭ كيەلى ورداسى «گۇلدەر» انسامبلىنىڭ ديرەكتورى بولىپ تاعايىندالدى. ونەردى جۇدەتپەي ۇدەتۋگە تىرىسامىن دەيدى ونەر يەسى. ەندەشە ارمان اعامىزعا ساتتىلىك تىلەيمىز!

Alashainasy.kz