جامبىل وبلىسىندا سايلاۋشىلاردىڭ جارتىسى داۋىس بەردى
«قازاقپارات» تىلشىسىنە سۇحبات بەرگەن جامبىل وبلىستىق اۋماقتىق سايلاۋ كوميسسياسىنىڭ ورىنباسارى نادەجدا ۆرۋبليەۆسكايا استانا ۋاقىتى بويىنشا ساعات 12:00 دە بيۋللەتەندەردى 49,91 پايىز سايلاۋشى، ياعني 256 مىڭ 944 ادام العانىن ايتتى.
«بەلسەندىلىك وتە جوعارى. بۇگىن اۋا رايىنىڭ قولايسىزدىعى، ياعني قاتتى جەل، داۋىل تۋرالى ەسكەرتۋ جاسالعانىنا قاراماستان ادامدار تاڭەرتەڭنەن بەرى وزدەرىنىڭ بولاشاعى، گۇلدەنگەن قازاقستان ءۇشىن داۋىس بەرۋگە كەلىپ جاتىر. ولاردىڭ مەرەكەلىك كوڭىل- كۇيى بايقالادى»، - دەدى ن. ۆرۋبليەۆسكايا.
وبلىستىق سايلاۋ كوميسسياسىنىڭ مالىمەتتەرىنشە، وبلىس اۋماعىندا 12 اۋماقتىق جانە 461 ۋچاسكەلىك سايلاۋ كوميسسياسى جۇمىس ىستەپ، تاۋلىك بويى قىزمەت اتقاراتىن Call-ورتالىقتار بار. سايلاۋ بارىسىن 435 بايقاۋشى باقىلاپ ءجۇر.
جامبىل وبلىسىندا بارلىعى 514 مىڭ 815 سايلاۋشى تىركەلگەن، بۇل وبلىس تۇرعىندارىنىڭ جارتىسىنا جۋىعىن قۇرايدى.
