جانىبەك دۇيسەمبايەۆ «تالدىقورعان ءبورىسى» سايىسىنىڭ ءۇش دۇركىن چەمپيونى اتاندى - فوتو

تالدىقورعان. قازاقپارات - «جاستار» سپورت سارايىندا قالا اكىمىنىڭ جۇلدەسىن بەرۋگە قازاقشا كۇرەستەن جارىس بولىپ ءوتتى.

«تالدىقورعان ءبورىسى» اتاعى مەن وبلىستىق جارىستا قالانىڭ ابىرويىن قورعاۋ قۇقىعى ءۇشىن 20 سپورتشى كۇش سىناستى.

سالتاناتتى راسىمگە تالدىقورعان قالاسىنىڭ اكىمى ەرمەك الپىسوۆ، ماسكەۋدە وتكەن وليمپيادانىڭ چەمپيونى جاقسىلىق ۇشكەمپىروۆ، «قازاقستان بارىسى» قازاقشا كۇرەستى قولداۋ قورىنىڭ اتقارۋشى ديرەكتورى جاناربەك اعىتايەۆ، اتلانتاداعى وليمپيادا ويىندارىنىڭ كۇمىس جۇلدەگەرى ماۋلەن مامىروۆ، سيدنەيدەگى وليمپيادا ويىندارىنىڭ قولا جۇلدەگەرى ايدىن سماعۇلوۆ جانە بەيجىڭدەگى وليمپيادانىڭ قولا مەدالىن يەلەنگەن نۇرباقىت تەڭىزبايەۆ قاتىستى.

قالا اكىمى جارىستىڭ بارلىق قاتىسۋشىلارىنا ايگىلى ارداگەرلەرىنىڭ جولىن قايتالاپ، الەمدىك ارەنالار مەن وليمپيادا ويىندارىندا جوعارى تۇعىردان كورىنۋگە تىلەگىن ءبىلدىردى.

جارىستىڭ اقتىق كەزەڭىنە جانىبەك دۇيسەمبايەۆ پەن توقتار قاركەتەروۆ شىقتى. بەلدەسۋدىڭ سوڭىنا دەيىن ءبىر جارىم مينۋت قالعاندا جانىبەك ەكى ءتاسىل قولدانىپ، جەڭىسكە جەتتى.

جارىستىڭ جۇلدە قورى 300 مىڭ تەڭگەنى قۇرادى، ونىڭ جارتىسىن جەڭىمپاز جانىبەك دۇيسەمبايەۆ السا، توقتار قاركەتەروۆ 100 مىڭ تەڭگەلىك سەرتيفيكات پەن جارىستىڭ كۇمىس جۇلدەسىنە يە بولدى. قولا جۇلدەنى قۋاندىق ەسەنوۆ قانجىعاسىنا بايلادى. ەندى جانىبەك پەن توقتار قالانىڭ ابىرويىن «جەتىسۋ ءبورىسى» وبلىستىق جارىسىندا قورعاماق.