گارۆاردتا وقىماعان عۇلامالار
جوق، مەن ولارىنا قارسى ەمەسپىن... كەرىسىنشە، قولدايمىن! اباي اتامىز ايتقانداي: «جاقسىدان ۇيرەنىپ، جاماننان جيرەنۋ» - قازىرگى ءبىزدىڭ اق پەن قارانى اجىراتا الماي جۇرگەن قوعامىمىزعا قاجەت- اق دۇنيە، دەسەك تە، كەيدە: «... جۇرگەن سوڭ باۋىرىندا كۇندە كورىپ، تاۋلاردىڭ بيىكتىگى بايقالمايدى» - دەگەندەي، وسىنداي الپاۋىت بيزنەس وكىلدەرىنىڭ كولەڭكەسىندە ەت جاقىنىمىز اتا- انالارىمىزدىڭ ايتقان اقىلىنا، دانالىعىنا ءمان بەرمەيدى ەكەنبىز... ايتپەسە، پەرزەنتى ءۇشىن ەڭ جاقسى زاتتى، ەڭ ءتاتتى تاعامدى، ەڭ قۇندى كەڭەسىن ايامايتىن ابزال جانداردىڭ بىزگە بەرەرى مول ەكەن...
سونداي، ءومىرىمنىڭ قالعان كۇنىنە جەتەرلىك رۋحاني ازىقتى الماتىعا وقۋعا اتتانارىمدا ءبىر اۋىز سوزىمەن اسىل اجەم دە بەرگەن ەكەن. وقىپ كورىڭىز:
- بالام، سەن بۇگىن ەر جەتىپ، ازامات اتانىپ ۇلكەن ومىرگە قادام باسىپ وتىرسىڭ. ەندى مىنە، از ۋاقىتتان سوڭ «ستۋدەنت» اتانىپ، ءبىلىمنىڭ دارياسىنا شىعاسىڭ، جاڭا ورتا، جاڭا دوستار تاباسىڭ. بىزدەن جىراقتا ءومىردىڭ ءار ءتۇرلى سىناقتارىنا كەز بولاسىڭ، شىڭدالاسىڭ، شىنىعاسىڭ تاعدىردىڭ تالقىسىنا تۇسەسىڭ. ءبىراق، بالام، قانداي جاعداي بولسا دا، باسىڭا قانداي ءىس تۇسسە دە ءوزىڭنىڭ مۇسىلمان ۇممەتى، ءيسى قازاقتىڭ پەرزەنتى جانە ءبىز سەكىلدى قارا شال مەن سارى كەپمىردىڭ ۇرپاعى ەكەنىڭدى ەشقاشان ەسىڭنەن شىعارما!
الماتى - ۇلكەن قالا. قالادا جۇرسەڭ دە دالانىڭ بالاسى ەكەندىگىڭدى ۇمىتپا، دىنىڭە، تىلىڭە، اتا- بابا سالت- داستۇرلەرىڭە بەكەم بول، ءبىز سەكىلدى سامايىنا اق تۇسكەن قاريا كورسەڭ الدىن كەسىپ وتپە، شاماڭ كەلسە كەرىسىنشە، ىسىنە جاردەم بەر. كەڭ بول، كەڭ بولساڭ كەم بولمايسىڭ! ءادىل بول، ءارى يمانىڭا كامىل بول! تۋىستىق بايلانىستى ۇزبە! بىلىمگە ىنتالى بول، ءار نارسەنى دەن قويىپ، ماعىناسىن ءتۇسىنىپ وقى، - دەپ ايتقان ەدى...
مىنە، ايتىلعانىنا اتتاي التى جىل بولسا دا، مەنىڭ ومىرلىك ۇستانىمىمنىڭ ءبىرى، باعىت- باعدارىمدى تۇزەۋشى تەمىرقازىعىم وسى شۇيكەدەي عانا ارنايى ءبىلىمى جوق اۋىل كەيۋاناسىنىڭ ءسوزى... گارۆاردتى بىتىرمەسە دە، ءومىر مەكتەبىنەن وتكەن ول كىسىنىڭ اقىلى مەن ءۇشىن باعا جەتپەس قازىنا!
جالەل باۋىرجان
namys.k
