سوعىستا حابارسىز كەتكەن مۇسابەك قوجاحمەتوۆتىڭ ولەڭمەن جازىلعان حاتى - فوتو
تەك ارتىندا قالعان، ەلدەگى تۋعان-تۋىسقاندارىنا جولداعان ءبىر جاپىراق حات-حابارلارى عانا ساقتالعان. سونىڭ ءبىرى، زەرەندى اۋدانىنداعى قاراشىلىك اۋىلىنان مايدانعا اتتانىپ، كەيىن حابارسىز كەتكەن مۇسابەك قوجاحمەتوۆتىڭ اتا-اناسى مەن تۋعان باۋىرلارىنا، ەل-جۇرتىنا ءوزىنىڭ اماندىعىن ايتىپ، سالەمىن جولداعان ولەڭ-حاتى دەر ەدىك.
بۇل حاتتى زەرەندى اۋدانى كراسيلوۆكا اۋىلىننىڭ تۇرعىنى فولكلورتانۋشى تەرەڭ بىلگىرى جانە داۋىسى ادەمى، ورىنداۋ شەبەرلىگى جوعارى ءانشى عازيزا تىلەۋوۆادان (1935-1989ج ج. ءومىر سۇرگەن) جازىلىپ الىنعان ەكەن.
كەيىن 1995-جىلى الماتىدا تۇراتىن جازۋشى ماعيرا قوجاحمەتوۆا بۇل ءاننىڭ اۆتورى مۇسابەك قوجاحمەتوۆتىڭ ستالينگراد شايقاسىندا قازا تاپقان ءوزىنىڭ اعاسى ەكەنىن ايتقان. بۇل ولەڭ «ورتەڭگە وسكەن قىزعالداقتار...» اتتى ۇلى وتان سوعىسى كەزىندە شىعارىلعان حات-ولەڭدەر جيناعىندا جارىق كورگەن.
ولەڭ جولدارىن «قازاقپارات» وقىرمانىنا ۇسىنامىز.
مەن بۇگىن قالام الدىم قاپالانىپ،
ومىردەن بەينەت كورىپ ءجۇرمىن تالىپ.
ءتۇستىم عوي جاستىق شاقتا مۇنداي كۇيگە،
كورەرمىز قىزىق كۇندى قايدا بارىپ.
كىم عارىپ وسى كۇندە - حالىق عارىپ،
كۇن كەشكەن جىلاپ-سىقتاپ، ارىپ-تالىپ.
شىققان سوڭ ۇزاق-ۇزاق سالەم جازام،
ارتتاعى ەل جۇرتىمدى ەسكە الىپ.
ءبىرىنشى الپەشتەگەن اكە-شەشەم،
بۇل كۇندە جۇرسىزدەر مە امان-ەسەن؟
جازايىن تۋعان جەرگە جالپى سالەم،
ولەڭگە بولماساق تا جۇيرىك شەشەن.
حات جازام بالاپيا قارىنداسقا،
ەي، اللا، ءولىم بەرمە بىزدەي جاسقا.
اتادان التاۋ بولىپ تۋساق تاعى،
جالعىزدىق كەلەدى ەكەن شىركىن باسقا.
باۋىرىم حات جازايىن، عازيز ءىنىم،
كوزىڭنەن اينالايىن، التىن كۇنىم
اسكەرگە مەن كەتەردە كوپ جىلاپ ەڭ،
بۇل كۇندە قانداي ەكەن سەنىڭ ءتۇرىڭ؟
حات جازام تۋعان اعا داۋلەتبەككە،
ءدام ايداپ ءوز ەلىمنەن شىقتىم شەتكە.
الدىمدا اتا-انا رەنىش كورسە،
كوڭىلىمدى قالدىرعانىڭ قالىڭ دەرتكە.
انادان بىرگە تۋعان اپاتايىم،
كۇن ساناپ وي تۇسەدى وسكەن سايىن.
تەمىردەي ءتارتىبى بار ويىندامىز.
وسىلاي سۇراعانعا مەنىڭ جايىم.
بۇل مىندەت وتان ءۇشىن امالىم جوق،
ەلدەگى ەركىن وسكەن زامانىم جوق.
ايتىسقان جاقسى-جامان قۇربىلارىم،
بۇل كۇندە ىشتەرىندە جامانىڭ جوق.
اۆتور: اسلان وسپانوۆ
