استانادا «مايدان اندەرى» مونوسپەكتاكلىنىڭ پرەمەراسى وتەدى

استانا. قازاقپارات - ۇلى جەڭىستىڭ 70 جىلدىعى مەرەيتويى اياسىندا، استانا قالاسى تىلدەردى دامىتۋ باسقارماسىنىڭ قولداۋىمەن ق ر حالىق ءارتيسى تىلەكتەس مەيراموۆ «مايدان اندەرى» اتتى مونوسپەكتاكلدىڭ پرەمەراسىن ۇسىنادى.

اتالعان شارا 29- ءساۋىر كۇنى ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا وتەدى. شىعارما اۆتورى - ر. سەيسەنبايەۆ، دەپ حابارلادى اتالعان باسقارمانىڭ باسپا ءسوز قىزمەتىنەن.

مايدان اندەرى... رەيحستاگ... بەرلين... 11- ماي... گلينكاشتراسسە كوشەسى... گريگوري اۆيلوۆ... جەڭىس... بۇل - الىستا قالعان ارداقتى كۇندەر بەلگىسى. ول باس كەيىپكەر سادىر بايبارىسوۆتىڭ سۇراپىل سوعىستا وتكەرگەن كۇندەرى. سادىر -سولدات. سوعىستان امان كەلگەن سولدات. سوعىستان ورالعان بەتتە ساقتىق مەكەمەسىنە قىزمەتكە تۇرعان. ءبىر مەكەمەنىڭ پىلدەي ريەۆيزورى بولىپ، وتىز ءبىر جىل قىزمەت اتقارىپ كەلەدى.

سادىر قاشاندا ءان ايتىپ جۇرەدى... ايتسا، مايداندا سالعان ءانىن ايتادى، كوكەيىندەگى ساعىنىشىن وسى اندەرمەن باسادى. تۇسىندە ىلعي مايدان، ۇرىس، دنەپردە وتكەن سوڭعى تۇندەرىن، جارالى مەرگەننىڭ ورىس قىزىن ارقالاپ كەلە جاتقاندا ۋكراين پارتيزاندارىنا تاپ بولعانىن كورەدى. سوعىس اياقتالسا دا، سادىردىڭ كوز الدىنان سول ءبىر سۇراپىل كەزدەر كەتەر ەمەس...

قازاقستاننىڭ حالىق ءارتيسى، اكتەر - تىلەكتەس مەيراموۆ ساحنا مەن كينوداعى ونەر تاجىريبەسىنىڭ تاعى ءبىر جاڭا قىرىن «مايدان اندەرى» اتتى مونوسپەكتاكلىندە اشادى. سولدات سادىردىڭ بەينەسىن - مەيراموۆتىڭ سومداۋىندا كورە الاسىز. مونوسپەكتاكل - ت. مەيراموۆتىڭ جۇرەگىنە، ءون بويىنا جاقىن جانردىڭ ءبىرى. مونوسپەكتاكل - بۇگىنگى قازاق تەاتر ونەرىنە سۇرانىپ تۇرعان جانردىڭ ءبىرى. كاسىبي اكتەردىڭ الەمىن تانىعىڭىز كەلسە، اكتەرلىك ونەردىڭ قىر-سىرىن تۇسىنگىڭىز كەلسە - «مايدان اندەرىن» كورۋگە اسىعىڭىزدار!