ەلوردانىڭ سايلاۋ ۋچاسكەلەرى داۋىس بەرۋ كۇنىنە تولىعىمەن دايىن
بۇل تۋرالى ق ر- داعى سايلاۋدى باقىلاۋ جونىندەگى رەسپۋبليكالىق قوعامدىق كوميسسياسىنىڭ مۇشەسى فاتيما ماتجانوۆا ايتتى.
«ءبىز ءبىرقاتار سايلاۋ ۋچاسكەسىن ارالاپ شىقتىق. ولاردىڭ اراسىندا بولىمشەلەر، قالا ماڭىنداعى سايلاۋ ۋچاسكەلەرى بار. بارلىق ۋچاسكەلەر تولىعىمەن دايىن. ءبىز ءتىزىمدى قاراپ شىقتىق، قوعامدىق بايقاۋشىلاردان ەشكىم بىزگە شاعىم جاسامادى. قانداي دا ءبىر ەسكەرتۋلەر مەن ايىپتاۋلار جوق. بارلىق ماتەريالدار دۇرىس وراتىلعان»، - دەدى ول قازاقپارات تىلشىسىنە تەلەفون ارقىلى.
سونىمەن قاتار ول بۇگىن قانداي دا ءبىر ۇگىت جۇرگىزۋگە تىيىم سالىنعان اتاپ ءوتتى. «تىنىشتىق كۇنى استانادا ساقتالىپ وتىر. قانداي دا ءبىر ءىس- قيمىل، ۇندەۋ ازىرشە ورىن المادى. بۇل سايلاۋدىڭ زاڭ اياسىندا وتۋىنە تىلەكتەسپىز»، - دەدى قوعامدىق كوميسسيا وكىلى.
ونىڭ اتاپ وتۋىنشە، قوعامدىق كوميسسيانىڭ نەگىزگى مىندەتى - سايلاۋ ۋچاسكەلەرىندەگى قوعامدىق بايقاۋشىلاردىڭ جۇمىسىن ۇيىمداستىرۋ.
«اعىمداعى جىلى ءبىز الدىمىزعا بارلىق سايلاۋ ۋچاسكەلەرىنە ءوزىمىزدىڭ بايقاۋشىلارىمىزدى جىبەرۋ تۋرالى ماقسات قويدىق. جالپى، ءوز كانديداتىن ۇسىنىپ، سايلاۋعا قاتىسۋعا نيەت تانىتىپ وتىرعان پارتيا ءاربىر سايلاۋ ۋچاسكەسىنە ءوزىنىڭ قوعامدىق بايقاۋشىسىن جىبەرۋگە قۇقى بار. سوىنمەن بىرگە زاڭعا سايكەس ءاربىر قوعامدىق بىرلەستىك تە ۋچاسكە جۇمىستارىنا ءوزىنىڭ ءبىر بايقاۋشىسىن جىبەرە الادى» ، - دەدى ف. ماتجانوۆا.
اۆتور: مارلان جيەمباي
