اتىراۋدا اقىلى كولىك نومىرلەرىنە قىزىعۋشىلىق ارتتى

استانا. قازاقپارات - اتىراۋ وبلىسىندا اقىلى كولىك نومىرلەرىن ساتىپ الۋعا قىزىعۋشىلىق ارتا ءتۇستى.

بۇل تۋرالى egemen.kz ءتىلشىسى حابارلادى.

ءۇش بىردەي تسيفرى جانە ەكى ءنولى بار نومىرلەردى ساتىپ الۋعا اتىراۋلىق كولىك يەلەرىنەن تاپسىرىستار كوپتەپ تۇسە باستاپتى. اكىمشىلىك پوليتسيا باسقارماسىنىڭ ءبولىم باسشىسى ارمان ايازعاليەۆتىڭ ايتۋىنشا، بىلتىرعى قازاننان بەرى اتىراۋلىقتارعا 119 كولىك ءنومىرى ساتىلىپتى.

ال بيىلعى جىل باستالىسىمەن كولىك يەلەرى وسىنداي 64 ءنومىردى ساتىپ الۋعا 21 ميلليون تەڭگەدەن استام قارجى تولەگەن.

كولىك يەلەرىنىڭ قىزىعۋشىلىعى اسىرەسە، 271 مىڭ 554 تەڭگەگە باعالانعان 111, 555, 888 جانە 451 مىڭ 896 تەڭگەلىك 001, 007 ساندارى بەينەلەنگەن نومىرلەرگە ارتا تۇسۋدە.