12:06, 24 - ءساۋىر 2015 | GMT +5
الماتى ۆەلوسيپەد تاقىمدايتىندارعا توسىن سىي ازىرلەۋدە
استانا. قازاقپارات - الماتىداعى ورتالىق دەمالىس ساياباعىنا ۆەلوجول توسەلەدى.
قۇرىلىسشىلار قوس دوڭگەلەكتى كولىككە ارنالعان سۇرلەۋ قۇرىلىسىن باستاپ كەتكەن.
جاڭا جول 3 شاقىرىمعا سوزىلادى. ال كەلەسى جىلى تۇڭعىش پرەزيدەنت ساياباعىندا وسىنداي جولاق پايدا بولماق.
وسىلايشا قالا بيلىگى ۆەلوسيپەد تاقىمدايتىندارعا توسىن سىي ازىرلەۋدە. الداعى ۋاقىتتا مۇنداي جولدار شاھاردىڭ بارلىق اۋداندارىندا پايدا بولادى.
«الماتى قالاسى بويىنشا كەڭ ءارى جاقسى ۆەلوسيپەد جولدارىن سالۋ جوسپارى بەكتىلگەن. ول قالانىڭ بارلىق اۋداندارىن قامتيتىن بولادى. وزدەرىڭىز كورىپ، كۋا بولىپ جاتىرسىزدار. قازىر شاھار بويىنشا اباي داڭعىلىندا العاشقى ۆەلوجول سالىنعان بولاتىن»، - دەدى الماتى قالاسى تابيعاي رەسۋرستار جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى باتىربەك بيجانوۆ.
