جىن جابىسقان قىز
اجەم ءباتيمانىڭ قولىندا اقجايىق اۋدانىنىڭ بۇلان اۋىلى جاعىندا تۇراتىن انام 25 جاستا، بولاشاقتا اتاقتى سىنىقشى بولامىن دەپ ويلاماعان ۋاقىت ەدى.
ءبىر كۇنى انام قاسىندا اۋىلدىڭ ءبىر توپ ادامى بار ات-اربامەن كورشى اۋىلدان كەلە جاتادى. جولاي باقشادان قاربىز الىپ، اربا ۇستىندە ءبارى جەپ الادى. كۇن باتىپ بارا جاتقان ۋاقىت. ارباداعى بويجەتكەن قىز قاربىزىن ءالى جەپ كەلە جاتقان-تىن. ءبىر كەزدە شىڭعىرىپ قۇلاپ ءتۇسىپتى. اياق استىنان كوزى شاپىراشتانىپ، الىسىپ، ەلىرىپ كەتەدى.
انام «قوي» دەسە عانا بۇعىپ، ۇندەمەي قالادى ەكەن. سودان ءبارى جابىلىپ، قىزدى بايلاپ مولداعا اكەلىپتى. مولدا: «شايتان قاعىپ كەتىپتى، كۇن باتىپ، جىندار كوشەتىن ۋاقىتتا جولدا تاماق جەگەنى نەسى؟ ءۇش كۇن وقيمىن» دەپ الىپ قالىپتى.
الىسىپ جاتقان قىزدىڭ قاسىنا انام بارسا، تىپ-تىنىش بولىپ قالاتىنىن بايقاعان مولدا اناما: « قىزىم، سەن قالا تۇر، جالعىز ءوزىمنىڭ شامام كەلمەس» دەيدى. حاباردى ەستىگەن قىزدىڭ اكە-شەشەسى كەلەدى. مولدا قۇرانىن اشىپ وقي باستايدى. قىز تىنىشتالعانداي بولىپ، ۇيدەگىلەر ۇيىقتاپ كەتەدى.
ءتۇننىڭ ورتاسىندا سىرتتا ءيتتىڭ قىڭسىلاعان دىبىسىنان انام ويانىپ كەتىپتى. قاراسا، قىز جوق. سىرتقا شىقسا، قىز مولدانىڭ ءيتىن ەكى قۇلاعىنان بۇراپ، ۇستىنە ءمىنىپ الىپتى. قاباعان ءيتتىڭ بەيشارا بولىپ موماقانسىپ قالعانىنا تاڭعالعان انام: «ءبىسمىللا» دەپ قىزدىڭ شاشىنان بۇراپ ۇستاپ، يتتەن ايىرىپ الادى. قۇتىلعان ءيت بايعۇس قىڭسىلاپ، قۇيرىعىن قىسىپ، قاشىپ كەتىپتى...
مولدا قىزدى قۇرانمەن وقىپ، اۋرۋىنان ايىقتىرىپ الادى. ءتاۋىر بولىپ، ەسى كىرگەن قىز اناما نە بولعانىن اڭگىمەلەپتى: «جولدا قاربىز جەپ كەلە جاتقانىمدا، اربانىڭ سوڭىنان شاشى جالبىراعان ءبىر ايەل ەردى. ىمداپ، قولىن سوزىپ مەنەن قاربىز سۇرايدى. ءبىراق ءسىز ماعان قاراي بۇرىلىپ قاراساڭىز، ول قورىققانداي كەيىن شەگىنىپ كەتەدى. ءسويتىپ كەلە جاتقاندا، ءسىز ارباداعى باسقا ادامدارعا قاراي بۇرىلىپ اڭگىمە ايتىپ كەتكەن ساتىڭىزدە ايەل شاپ بەرىپ مەنىڭ قولىمداعى قاربىزدى تارتىپ الدى.
مەن قۇلاپ ءتۇستىم. ولار مەنىمەن بىرگە مولدانىڭ ۇيىنە دە باردى. ءبىراق ىشكە كىرە الماي، سىرتتا، تەرەزەنىڭ جوعارى جاعىنان، پەردەنىڭ اشىق جەرىنەن قاراپ تۇردى. سەندەر ۇيىقتاپ كەتكەندە تەرەزەدەن ءۇڭىلىپ، ىمداپ، مەنى سىرتقا شاقىردى. ولار سوڭىنان كوبەيىپ كەتتى، ءبىراق، نەگە ەكەنىن قايدام، ءسىز كەلە جاتقاندا قاشىپ كەتتى» دەپتى.
zhaikpress.kz
