ەكىنشى دۇنيە جۇزىلىك سوعىس ارداگەرلەرى قولدارىنا قايتا قارۋ الدى - فوتو
مۇنداي شارا الماتى وبلىسىنداعى اسكەري الاڭداردىڭ بىرىندە جەڭىستىڭ جەتپىس جىلدىعىنا وراي ۇيىمداستىرىلدى.
قۇرالايدى كوزگە اتقان مەرگەندەردىڭ ونەرىن NUR. KZ ءتىلشىسى دە تاماشالاپ قايتقان ەدى.
بۇل - توقسانعا كەلگەن ەكىنشى دۇنيە جۇزىلىك سوعىسىنىڭ ارداگەرى ۆاسيليي زەنچينكا. 1942-جىلى سوعىسقا نەبارى 17 جاسىندا اتتانعان قارت مايدانگەردىڭ مىلتىق ۇستاعان قولى ءالى دە بولسا قالتىرامايدى. ونىڭ دالەلى اقساقال ءتورت وق اتىپ، ۇشەۋىن نىساناعا ءدال تيگىزدى.
«بۇرىندارى ون وق اتسام ءبارىن تيگىزەتىن ەدىم. قازىرگى ناتيجەمدى وزدەرىڭىز كورىپ تۇرسىزدار»، - دەپ جىميدى ارداگەر.
سونداي-اق، ارداگەر سوعىستا ۆورونەج قالاسىن ازات ەتۋدەگى، ستالينگراد تۇبىندەگى شايقاستارعا قاتىسقانىن ەسىنە ءتۇسىردى.
«مەن قارۋدى ەڭ العاش بوزبالا كەزىندە كوردىم. ياعني سوعىسقا اتتانعاندا. ءبىرىنشى رەت ۆورونەج قالاسىن العاندا جارالاندىم. ءبىراز ۋاقىت گوسپيتالدا جاتىپ جازىلىپ شىقتىم. قازىرگى وسكەلەڭ ۇرپاق وسى بەيبىت زاماننىڭ قادىرىن ءبىلۋى كەرەك دەپ ويلايمىن»، - دەيدى ۆاسيلي زەنچينكا.
بۇل شاراعا جينالعاندار زاماناۋي قورعانىس قۇرالدارىمەن تانىستى. ءارى سوعىس كەزىندەگى موسين مىلتىعى، ماكسيم پۋلەمەتى، ت ت تاپانشالارىن تاعى ءبىر مارتە قولدارىنا الىپ، فاشيستەرگە قارسى جورىققا اتتانعان ساتتەرى تۋرالى اڭگىمەلەدى. ءتىپتى، ولاردىڭ اراسىندا سوعىستا ايتىلعان ءاندى شىرقاعاندارى دا بولدى.
جالپى الماتى قالاسىندا 500 گە جۋىق ارداگەر بولسا، ىلە وقۋ جاتتىعۋ پوليگونىندا وتكەن بۇل شاراعا سونىڭ تورتەۋى عانا قاتىستى.
اەروۇتقىر اسكەرىنىڭ سىمداي تارتىلعان ساربازدارى بولىمشەگە قوناققا كەلگەن مايدانگەرلەرگە العىستارىن ءبىلدىرىپ، قۇرمەت كورسەتتى.
وسىلايشا، بۇل شارا ارداگەرلەرگە كوتەرىڭكى كوڭىل-كۇي سىيلادى. الداعى ۋاقىتتا جەڭىسكە، سوعىس ارداگەرلەرىنە دەگەن قۇرمەت باسقا اسكەري بولىمشەلەرىندە جالعاسىن تاپپاق
