ساۋالناما: ۇلى وتان سوعىسىنىڭ باتىرلارىن بىلەمىز بە؟ - كەسكىن

استانا. قازاقپارات - استانادا ءاليا مولداعۇلوۆانىڭ ەسكەرتكىشى ماڭىندا تىلشىلەر قازاقستاننان شىققان كەڭەس وداعى باتىرلارىنىڭ سۋرەتتەرىن الىپ، حالىق اراسىندا ساۋالناما جۇرگىزدى.

رەسپوندەنتتەرگە 12 باتىردىڭ فوتوسۋرەتتەرى ۇسىنىلدى.

ولاردىڭ قاتارىندا حيۋاز دوسپانوۆا، مالىك عابدۋللين، باۋىرجان مومىش ۇلى، راقىمجان قوشقاربايەۆ، قارسىباي سىپاتايەۆ، نيكولاي تەرەشەنكو، ءاليا مولداعۇلوۆا، مانشۇك مامەتوۆا، لەونيد بەدا، ساعادات نۇرماعامبەتوۆ، تالعات بيگەلدينوۆ، نۇركەن ءابدىروۆ سىندى ەلەۋلى ەسىمدەر بار.

 ساۋالنامامىزدىڭ ناتيجەسى كوڭىل كونشىتەرلىك ەمەس - جۇرت ءوز باتىرلارىن بىلمەيتىن بولىپ شىقتى. سولتۇستىك كاۆكاز، كۋبان، قىرىم، ۋكراينا، بەلورۋسسيا، پولشا، گەرمانيا اسپانىنداعى سۇراپىل شايقاستارعا قاتىسىپ، نەمىس اسكەرىنە توبەدەن قىرعيداي تيگەن حيۋاز دوسپانوۆانى بىرەۋلەر نۇركەن ابدىروۆپەن شاتاستىرىپ جاتسا، ماسكەۋدى جاۋ قولىنان ساقتاپ قالعان اسكەر باسى باۋىرجان مومىش ۇلى كوپ رەتتە ەلەنبەي جاتتى.

كۋبا كوسەمى فيدەل كاسترونىڭ تاڭدايىن قاقتىرعان ەرەن ەر قازاققا ەلەۋسىز قالعانىنا قىنجىلدىق. دەگەنمەن، سۇرالعانداردىڭ ىشىنەن ءاليا مولداعۇلوۆا مەن مانشۇك مامەتوۆانى تانىعاندار تابىلدى. ساۋالناماعا قاتىسقان ادامدارعا قازاقستان جەرىنەن سوعىسقا اتتانىپ، اسقان ەرلىكتەرىمەن ەلگە تانىلعان باتىرلاردىڭ ءومىربايانى مەن ەرلىكتەرى جازىلعان پاراقشالار تاراتىپ وتىردىق.

تۇرعىنداردىڭ ايتۋىنشا، ۇلى وتان سوعىسىنىڭ باتىرلارى تۋرالى اقپارات وتە سيرەك كەزدەسەدى. مەكتەپتەردە دە بۇل تاقىرىپ تەرەڭنەن قاۋزالمايدى دەپ وتىر. ءسوزدىڭ جانى دا بار شىعار، ءبىراق ىزدەيمىن دەسە، كەز كەلگەن مالىمەت جەتەرلىك ەمەس پە دەگەن ويدا قالدىق.

شارا ۇلى وتان سوعىسىنداعى جەڭىس كۇنىنىڭ 70 جىلدىعىنا ارنالعان «ماڭگى ەسىمىزدە» اتتى جۋرناليستەر اراسىنداعى شىعارماشىلىق بايقاۋ اياسىندا وتكەن بولاتىن. ۇلى وتان سوعىسى تاقىرىبىنداعى ۇزدىك جۋرناليستىك ماتەريالدى انىقتايتىن بايقاۋ قازاقستان رەسپۋبليكاسىندا شىعاتىن رەسپۋبليكالىق جانە قالالىق بۇقارالىق اقپارات قۇرالدارى، سونىمەن بىرگە ەلەكتروندى بۇقارالىق اقپارات قۇرالدارى اراسىندا جەكەلەگەن اتالىمدار بويىنشا قورعانىس مينيسترلىگىنىڭ مۇرىندىق بولۋىمەن وتكىزىلۋدە.

وعان ۇلى وتان سوعىسىنىڭ تاريحى، مايدانگەرلەردىڭ سوعىستان كەيىنگى تاعدىرى، تىل ەڭبەككەرلەرى، ۇوس ارداگەرلەرىنىڭ قوعامدىق ۇيىمدارى، مايدان دالاسىندا قازا تاپقانداردى ىزدەستىرۋ تۋرالى ماتەريالداردى جاريالاعان گازەت، راديو مەن تەلەارنا، اقپاراتتىق اگەنتتىك تىلشىلەرى، سونىمەن بىرگە شتاتتان تىس اۆتورلار قاتىسا الادى.

 بايقاۋ جاستاردى پاتريوتتىق رۋحتا تاربيەلەۋ جانە جۋرناليستەردى الەۋمەتتىك ماڭىزدى تاقىرىپتاردى تالقىلاۋعا تارتۋ ماقساتىندا وتكىزىلەدى.

 اۆتور: جاسۇلان جولدىبايەۆ