تۇرىك، قىرعىز، ازەربايجان جانە قازاق ەلى ستراتەگيالىق زەرتتەۋلەر ينستيتۋتتارى بىرلەسە جۇمىس ىستەمەك
شارا اياسىندا تۇركيا، قىرعىزستان، ءازىربايجان جانە قازاقستاننىڭ ستراتەگيالىق زەرتتەۋلەر ينستيتۋتتارىنىڭ ديرەكتورلارى ءوزارا ىنتىماقتاستىق تۋرالى مەموراندۋمعا قول قويدى.
«بۇگىن 4 مەملەكەتتىڭ ستراتەگيالىق زەرتتەۋلەر ينتستيتۋتتارى ورتاق مەموراندۋمعا قول قويىپ وتىرمىز. وسى ۋاقىتقا دەيىن، شىنى كەرەك، اسا قاتتى بەلسەندى قاتىناس بولعان جوق. مىسالى، ازەربايجاننىڭ ستراتەگيالىق زەرتتەۋلەر ينتستيتۋتىنىڭ ديرەكتورى فارحاد ماممادوۆ استاناعا ءبىرىنشى رەت كەلىپ وتىر. ەندى، وسى ولقىلىقتى تۇزەتىپ، ءجيى ارىپتەستىك بايلانىس ورناتپاقشىمىز. ءار ءتۇرلى ۇسىنىستارىمىزدى جاسايمىز. مامانداردى دايىنداۋ بويىنشا ورتاق باعدارلاما قابىلداۋعا كەلىستىك. ناقتى جۇمىس جوسپارىن 2 اپتادان كەيىن باكۋ قالاسىندا قابىلدايتىن بولامىز»، - دەيدى ستراتەگيالىق زەرتتەۋلەر ينتستيتۋتىنىڭ ديرەكتورى ەرلان قارين.
ونىڭ اتاپ وتۋىنشە، بۇل مەموراندۋم تۋرالى ۇسىنىستى قازاقستان تاراپى جاساعان. كەلەسى باسقوسۋ ەندى 8 -مامىردا ءازىربايجان استاناسى باكۋ قالاسىندا وتەدى. نەگىزگى تالقىلاۋلار، وزەكتى ماسەلەلەر سول جەردە شەشىلەتىن بولادى.
