زەرەندىلىك كاسىپكەر قۇرت ءوسىرىپ تابىسقا كەنەلمەك

كوكشەتاۋ. قازاقپارات - اقمولا وبلىسى زەرەندى اۋدانىنىڭ تۇرعىنى قۇرت وسىرۋمەن اينالىسۋدا. قۇرت بولعاندا، كادىمگى جاۋىن قۇرتى.

بۇل تىڭ جوبانى قولعا الىپ وتىرعان جەكە كاسىپكەر تالعات جاقىپوۆ قازىردىڭ وزىندە ومىرتقاسىزداردىڭ سانى 10 ميلليونعا جەتكىزگەن.

 كاسىپكەردىڭ سوزىنە قاراعاندا، قۇرتتار تەك «ءوندىرىس قۇرالى» بولىپ تابىلادى. قۇرتتىڭ كومەگىمەن الىناتىن بيوگۋمۋس باعباندار اراسىندا ۇلكەن سۇرانىسقا يە بولۋدا.

«جەرگىلىكتى نارىقتى زەرتتەپ شىعىپ، وندا بيوگۋمۋستىڭ رەسەيدەن اكەلىنەتىنىنە كوز جەتكىزگەن سوڭ وسى بيزنەسپەن اينالىسۋعا بەل بۋدىم. بيوگۋمۋستى ەكولوگيالىق جاعىنان تازا تاسىلمەن جاۋىن قۇرتى وندىرەدى. بۇل مينەرالدىق تىڭايتقىشتاردى الماستىرا الادى. مەنىڭ ءونىمىم اگرارييلەردىڭ ءتۇسىمدى بىرنەشە ەسە كوتەرۋىنە مۇمكىندىك بەرەدى»، - دەيدى كاسىپكەر.

كاسىپورىننىڭ جىلىنا 2000 توننا تيىمدىلىگى جوعارى ءارى ەكولوگيالىق تازا ءونىم شىعارۋعا قۋاتى بار. بۇل بىلاي قاراعاندا وڭاي شارۋا سياقتى. دەگەنمەن، ومىرتقاسىزداردىڭ بارلىعى بىردەي وندىرىسكە جارامدى بولا بەرمەيدى. جوعارى ءونىم الۋ ءۇشىن كاسىپكەر «ستاراتەل» قۇرتتارىن وسىرەدى ەكەن.

 ەسكە سالا كەتسەك، «ستاراتەل» قۇرتى قي قۇرتىنىڭ نەگىزىندە كەڭەس عالىمى اناتولي يگونيننىڭ عىلىمي ەڭبەگىنىڭ ناتيجەسىندە پايدا بولعان. ول ءبىزدىڭ كليماتتىق ەرەكشەلىگىمىزگە ساي كەلەدى. ونىڭ شەتەلدەگى باۋىرلاسىنان ايىرماشىلىعى - سالقىن تەمپەراتۋرادا ءوزىن ساقتاۋ تۇيسىگى ىسكە قوسىلادى. ءوسىپ-ءونۋ جىلدامدىعى بويىنشا ءبىزدىڭ «ستاراتەل» 50- جىلدارى كادىمگى قي قۇرتىنىڭ نەگىزىندە وسىرىلە باستاعان كاليفورنيالىق قىزىل قۇرتتان «امەريكالىق باررەت» ەش كەم تۇسپەيدى. ەسەسىنە اناعۇرلىم كەڭ اۋقىمداعى تەمپەراتۋرادا جۇمىس ىستەيتىن قۇرت كورىنەدى.

قازىردە تالعات جاقىپوۆ وتكىزۋ ءۇشىن 200 توننا بيوگۋمۋس دايىنداپ قويىپتى. ونىڭ ايتۋىنشا، ءوندىرىستى ۇيىمداستىرۋدا ەرەكشە تۇيتكىل تۋىندامايدى. ءبىر عانا شەشىمىن كۇتىپ وتىرعان ماسەلە بار. ول ءونىمدى نارىققا شىعارۋ ءۇشىن تاۋاردى سەرتيفيكاتتاۋ جانە ساۋدا تاڭباسىن جاساقتاۋ ءۇشىن ىدىس ازىرلەۋ قاجەت.

«بۇلاردىڭ بارلىعى بيزنەستى ودان ءارى دامىتۋ ءۇشىن اۋاداي قاجەت. جاقىندا كاسىپكەرلەر پالاتاسىنا وسى ماسەلەمدى ايتىپ، جۇگىندىم. ول جاقتاعىلار مەنىڭ بەتىمنەن قاقپاي كەرىسىنشە، بۇل كاسىبىمە قولداۋ ءبىلدىرىپ، تولىققاندى ءوندىرۋشى رەتىندە نارىققا شىعۋىما كومەكتەسەتىندىكتەرىن جەتكىزدى»، - دەيدى تالعات جاقىپوۆ.

اۆتور: اسلان وسپانوۆ