ەلىمىزدە مۋزەيلەر قىزمەتىنە ارنالعان كاسىبي سايت اشىلدى

استانا. قازاقپارات - ەلىمىزدە العاش رەت وتاندىق مۋزەيلەردى اقپاراتتىق جانە ادىستەمەلىك تۇرعىدان قولداۋعا ارنالعان سايت اشىلدى. بۇل تۋرالى يدەيا اۆتورى، مۋزەيتانۋشى نۇرسەرىك جولبارىس مالىمدەدى.

«وتاندىق مۋزەيلەر اقپاراتتىق قولداۋ مەن ادىستەمەلىك كومەككە مۇقتاج بولىپ كەلەدى. قازاقستاندا مۋزەي قىزمەتى تۋرالى جاريالايتىن كاسىبي سايتتار مۇلدە جوق. مۋزەي ماماندارى ادىستەمەلىك كومەك الۋ ءۇشىن وزگە تىلدەردەگى سايتتاردىڭ قىزمەتىنە جۇگىنۋگە ءماجبۇر. ءبىز وسى ولقىلىقتىڭ ورنىن تولتىرۋ ءۇشىن اقپاراتتىق-ادىستەمەلىك سايت اشۋدى قولعا الدىق»، - دەدى ن. جولبارىس.

سايتتا تانىمدىق تۇرعىدان اقپاراتتار بەرەتىن بىرنەشە ايدار جۇمىس ىستەيدى. ەل جانە شەتەل مۋزەيلەرى تۋرالى اقپارات جاريالايتىن «قازاقستان مۋزەيلەرى»، «الەم مۋزەيلەرى» جانە ادىستەمەلىك كومەك بەرەتىن «مامان كەڭەسى» ايدارلارى اشىلعان. سونىمەن قاتار بۇقارامەن تىعىز جۇمىس ىستەۋ ماقساتىندا «مۋزەي جانە قوعام»، «مۋزەي جانە ەكسپو»، «قولدا بار جادىگەر» ايدارلارى دا جاسالعان.

سايت تۇراقتى تۇردە «جادىگەر سىرى» دەگەن اتپەن ق ر ۇلتتىق مۋزەيىنىڭ التىن قورىندا ساقتاۋلى تۇرعان جادىگەرلەر تۋرالى جاريالاماق. سونداي-اق، سايتتا مۋزەي ۇجىمدارى مەن جەكەلەنگەن قىزمەتكەرلەر ءۇشىن بايقاۋلار دا ۇيىمداستىرىلعان.

ۇجىمنىڭ الداعى ۋاقىتتا بىرنەشە جوبانى جۇزەگە اسىراتىن ويلارى بار. مىسالى، ەلىمىزدەگى ۇزدىك مۋزەي ماماندارىنىڭ ونلاين-كونفەرەنتسيالارى وتكىزىلمەك. ايتا كەتۋ كەرەك، ازىرگە قازاق تىلىندە اقپارات تاراتاتىن سايت الداعى ۋاقىتتا ورىس جانە اعىلشىن تىلدەرىندە دە اقپارات تاراتپاق.

www.24.kz