پۋتين سوڭعى كەزدەرى ۋكراينا جايلى ايتۋدى نەگە ازايتتى؟
ءساۋىردىڭ 16 سى كۇنى رەسەي پرەزيدەنتى ۆلاديمير پۋتيننىڭ ءداستۇرلى «تىكەلەي ەفيرىنە» رەكوردتى دەڭگەيدە - ءۇش ميلليوننان اسا سۇراق ءتۇسىپ، پرەزيدەنت ونىڭ 70 كە جۋىعىنا جاۋاپ بەرگەنى حابارلاندى.
سۇراقتار ەلدىڭ ءار ايماعىندا تۇراتىن رەسەيلىكتەرمەن سويلەسكەن تىلشىلەردەن، ستۋدياداعى ادامداردان، تەلەفون، ينتەرنەت جانە الەۋمەتتىك جەلىلەر ارقىلى تۇسكەن.
ۆلاديمير پۋتيندى «شوۋمەن» دەپ اتاعان امەريكالىق Foreign Policy جۋرنالىنىڭ جازۋىنشا، كەيبىر سۇراقتارعا جاۋاپتار «رەسەي باسشىسى ۋكرايناداعى قاقتىعىستان كەيىن ازايعان بەدەلىن نىعايتۋ ءۇشىن مۇنداي سپەكتاكلدەردى قالاي پايدالاناتىنىن كورسەتتى» دەپ جازادى.
امەريكانىڭ New York Times گازەتىنىڭ جازۋىنشا، 2014-جىلى ۆلاديمير پۋتين «قىرىم اننەكسياسى مەن ۇلت ماقتانىشى كريتەريلەرىن دارىپتەسە، بيىل پۋتين مىرزا رەسەيدىڭ ءار تۇكپىرىنەن قويىلعان سيىر ءسۇتىن ءوندىرۋ، شاعىن نەسيە بەرۋ جانە اۆتوكولىكتەردى ساقتاندىرۋ باعاسىنىڭ قىمباتتاۋى جايلى سۇراقتارعا جاۋاپ بەرگەن.
پۋتين «تۇتاستاي العاندا، ەكونوميكاداعى جاعدايدى جاقسى جاعىنان كورسەتۋگە تىرىسقان» ءارى ساراپشىلاردىڭ «قيىندىقتاردىڭ قارقىنى باسەڭدەدى» دەگەن پىكىرىنە سىلتەمە جاساعان.
Wall Street Journal جۋرنالىنىڭ جازۋىنشا، رۋبل كۇرت قۇلدىراعان جەلتوقسان ايىندا وتكىزىلگەن «ۇلكەن سۇراق-جاۋاپ سەسسياسىمەن سالىستىرعاندا، پرەزيدەنت سوزدەرىنىڭ جالپى سارىنى مۇلدە وزگەرگەن».
New York Times گازەتىنىڭ جازۋىنشا، «تىكەلەي ەفيردە» شەتەل ساياساتىنا قاتىستى ماسەلەلەر قوزعالعانىمەن، «بۇل تاقىرىپقا قاتىستى العاشقى سۇراق باعدارلاما باستالعانان كەيىن ءبىر ساعات وتكەندە عانا قويىلعان». پۋتين كوبىنەسە بۇرىنعى تەزيستەرىن قايتالاعان.
ۋكرايناعا قاتىستى ايتقان سوزىندە ۆلاديمير پۋتين «ۋكراينا مينسك كەلىسىمىنىڭ اتىستى توقتاتۋ، كونستيتۋتسيالىق رەفورمالار جۇرگىزۋ، سەپاراتيستىك ايماقتاردى قارجىلاي قولداۋ تۋرالى شارتتارىن ورىنداماي وتىر، ءبىراق رەسەي كەلىسىم شارتتارىن ۇستانادى» دەپ مالىمدەگەن.
New York Times گازەتى «پۋتيننىڭ مالىمدەۋىنشە، ۋكراينادا رەسەي اسكەرلەرى جوق» دەپ قورىتادى. Foreign Policy باسىلىمى رەسەيلىك وپپوزيتسيالىق ساياساتكەر يرينا حاكامادانىڭ «شىعىس ۋكراينادا رەسەيلىك سولداتتار سوعىسىپ جاتىر ما؟» دەگەن سۇراعىنا پرەزيدەنتتىڭ «جوق» دەپ جاۋاپ بەرگەنىن جازعان.
كەيىنىرەك ول ۋكراينا مەن رەسەي اراسىندا سوعىس بولۋى «مۇمكىن ەمەس» دەپ مالىمدەگەن.
New York Times گازەتى ۆلاديمير پۋتيننىڭ ءسوز سارىنى «مۇلدە قاراما-قارسى باعىتقا» وزگەرگەنىن ايتادى. گازەتتىڭ جازۋىنشا، كۇزدە پۋتين ورىس ءتىلدى جۇرتتى قورعاۋ ءۇشىن كورشى ەلدەردىڭ، اسىرەسە بۇرىن پاتشالىق رەسەي باسقىنشىلىقپەن العان ۋكراينانىڭ وڭتۇستىك-شىعىس بولىگىن باسىپ الۋعا دايىن ەكەنىن ايتقان.
ءبىراق، سوڭعى «تىكەلەي ەفيرىندە» ۆلاديمير پۋتين رەسەيدىڭ «يمپەريالىق پيعىلى جوق» ەكەنىن، الايدا «شەتەلدە تۇراتىن ورىستاردىڭ لايىقتى ءومىر ءسۇرۋىن ىنتىماقتاستىقتى دامىتۋ ارقىلى قامتاماسىز ەتە الامىز» دەپ مالىمدەگەن.
«ازاتتىق»
