قىرعىزستان شەكاراسىندا تابىلعان وق-ءدارى قازاقستاندىققا تيەسىلى بولىپ شىقتى
بۇل تۋرالى قىرعىزستاننىڭ مەملەكەتتىك شەكارا قىزمەتىنىڭ ب ا ق جانە قوعاممەن بايلانىس ءبولىمى حابارلادى.
شەكارا قىزمەتىنىڭ مالىمەتىنشە، 19- ساۋىردە «چالدىبار-اۆتودوروجنىي» باقىلاۋ-وتكىزۋ بەكەتىندە Audi 100 اۆتوكولىگىن تەكسەرۋ بارىسىندا 16 ميلليمەتر كاليبرلى 1 وق-ءدارى تابىلعان.
«قازىرگى تاڭدا وق-ءدارىنىڭ قازاقستان ازاماتىنا تيەسىلى ەكەنى انىقتالىپ وتىر. ول قىرعىزستاننان قازاقستان اۋماعىنا وتپەكشى بولعان»، - دەلىنگەن حابارلامادا.
ايتا كەتەيىك، قازاقستان ازاماتىنا قاتىستى ءتيىستى قۇجاتتار تولتىرىلعاننان كەيىن ول پانفيلوۆ اۋداندىق ىشكى ىستەر ءبولىمىنىڭ قىزمەتكەرلەرىنە تاپسىرىلدى.
ەسكە سالا كەتەيىك، بۇعان دەيىن قىرعىز رەسپۋبليكاسىندا قازاقستاننىڭ قارۋلى ازاماتىنىڭ ۇستالعانى حابارلانعان بولاتىن. «ۇستالعان ازاماتقا تيەسىلى Lexus GS-300 اۆتوكولىگىن تەكسەرۋ بارىسىندا» اق-جول اۆتوجولى» بەكەتىنىڭ شەكاراشىلارى كولىكتەن «ليدەر» تاپانشاسى مەن جەتى وقتى تاۋىپ، تاركىلەدى. قازاقستان ازاماتىنىڭ قارۋدى قولدانۋعا رۇقسات بەرگەن قۇجاتتارىنىڭ مەرزىمى ءوتىپ كەتكەنى انىقتالدى»، - دەپ حابارلادى شەكاراشىلار.
