قىرعىزستاندا وش اۋەجايى جاڭا جەرگە كوشىرىلەدى

بىشكەك. قازاقپارات - قىرعىزستاننىڭ وڭتۇستىك استاناسىنىڭ ۇسىنىلىپ وتىرعان جاڭا باس جوسپارىندا وش اۋەجايىن جاڭا ورىنعا كوشىرۋ قاراستىرىلعان. بۇل تۋرالى وش قالاسىنىڭ باس جوسپارى جوباسىنىڭ اۆتورى جانۇزاق كولباتىروۆ ءمالىم ەتتى.

ماماننىڭ ايتۋىنشا، وش قالاسىنىڭ جاڭا باس جوسپارىن ازىرلەۋ قاجەتتىلىگى 1999-جىلعى باس جوسپارىنىڭ ەسكىرۋىمەن بايلانىستى.

«1999-جىلعى قالانىڭ باس جوسپارىندا جاڭادان سالىنعان كوپتەگەن عيماراتتار، مەكتەپتەر، الەۋمەتتىك نىساندار مەن باسقا عيماراتتار نەگىزگى باس جوسپارعا ەنگىزىلمەگەن»، - دەدى ول.

ج. كولباتىروۆ اتاپ وتكەندەي، وش قالاسىنىڭ جاڭا باس جوسپارى 2015-جىلدىڭ سوڭىندا دايىن بولادى. جاڭا باس جوسپار جوباسىندا وش اۋەجايىن جاڭا ورىنعا كوشىرۋ دە قاراستىرىلعان.

وش حالىقارالىق اۋەجايى فەرعانا جازىعىنداعى ءىرى اۋە كەڭىستىگىنىڭ ءبىرى بولىپ تابىلادى. مۇندا قىرعىزستاننىڭ وڭتۇستىك وڭىرلەرىنەن اۋەمەن تاسىمالداۋ قىزمەتى قامتاماسىز ەتىلەدى. ول بىشكەك قالاسىنان 389 شاقىرىم، ال تاشكەنتتەن 322 شاقىرىم قاشىقتىقتا ورنالاسقان. رەسەي، تۇركيا، قىتاي، ب ا ءا اۋە رەيستەرىن قابىلدايدى.