مۇسىلمانداردى قورعاعان بويجەتكەن عالامتور جۇلدىزىنا اينالدى

استانا. قازاقپارات - ستەيسي ەدەن ەسىمدى اۆستراليالىق بويجەتكەن مۇسىلمان ايەلىن قورعاپ، عالامتور جۇلدىزىنا اينالدى.

ناقتىراق ايتقاندا، بۇل جاعداي مەترودا ورىن العان بولاتىن.

اشۋعا مىنگەن ەگدە ايەل وزىمەن بىرگە ءبىر ۆاگوندا كەتىپ بارا جاتقان مۇسىلمان ايەلىنە سوقتىعىسىپ، ايتپاعانى قالمايدى: «ونىڭ قالاي كيىنگەنىن قاراڭدار! سەندەر - جيھادشىلسىڭدار! سەندەر سەكىلدىلەردىڭ كەسىرىنەن Martin Place تە ادامدار قىرىلدى (وتكەن جىلى وسى كوشەدە ورنالاسقان كافەدە تەرروريستەر ادامداردى كەپىلدىككە الىپ، ۇشەۋىن ولتىرگەن بولاتىن -  رەد.)».

اشۋلى ايەلدىڭ جانىندا تۇرعان 23 جاستاعى ستەيسي ەدەن ونىڭ جالاعا تولى بۇل سوزدەرىنە ءتوزىپ تۇرا المادى: «ول ءسىز سەكىلدى جۇگەنسىز كەتكەن ادامدار ءۇشىن ەمەس، ءوزى ءۇشىن شاريعات ءشالىسىن جامىلادى. ول ءتانىن جالاڭاشتاماۋ ءۇشىن وسىلاي كيىنەدى. ءسىزدىڭ وعان بۇلاي دۇرسە قويا بەرۋگە قاقىڭىز جوق. Martin Place تە بولعان وقيعاعا ونىڭ ەش قاتىسى جوق. ادامداردى سىيلاپ ۇيرەنىڭىز. ادامداردى كيىمىنە نەمەسە تۇرىنە قاراپ باعا بەرۋگە بولمايدى».

كۋاگەرلەر ولاردىڭ اراسىنداعى تارتىستى ۆيدەوعا ءتۇسىرىپ، ارتىنان الەۋمەتتىك جەلىگە ورنالاستىرعان ەكەن.