بيبىگۇل ساۋىتوۆا، ءداستۇرلى ءانشى: ءداستۇرلى ءانشى ەسترادامەن ايتپاسىن دەگەن زاڭ جوق - فوتو
- انمەن تانىستىعىم التى جاستان باستالدى. كىشكەنتايىمنان قولىما دومبىرا الىپ، ءان ايتا باستاپپىن. دومبىرا تارتۋدى ەشكىم ۇيرەتكەن دە جوق. بولماسا مۋزىكالىق مەكتەپتە وقىمادىم دا. تۋا بىتكەن قاسيەت دەسەم بولادى.
اكەمنىڭ قانىمەن، انانىڭ سۇتىمەن دارىعان ونەر دەپ ويلايمىن. اكەم-كۇيشى، انام - ءانشى. جالپى ونەرلى وتباسىندا دۇنيەگە كەلگەنمىن. ون ءبىر پەرزەنتتىڭ ونىنشىسىمىن. انام مەنى بوسانعاننان كەيىن اكەمنىڭ قارىنداسى اكەمنەن ءسۇيىنشى سۇراپ بارعان كەزدە، اكەم بيبىگۇل تولەگەنوۆانىڭ كونسەرتىن كورىپ وتىرىپتى. «ۇل ما، قىز با؟ قىز بولسا اتىن بيبىگۇل قويامىن»، - دەپ قۋانىشتان مەنىڭ اتىمدى بيبىگۇل قويعان ەكەن.
سول كىسى سەكىلدى ءانشى بولسىن دەگەن نيەتتەرى عوي. اكەمنىڭ ارمانى بولار؟.. بارلىعى ونەرگە جاقىن بولعانىمەن، ۇلكەن ونەرگە قادام باسقانى مەنمىن. ەڭ العاشقى ۇستازىم دەپ تۋعان اعام نۇرجارىقتى ايتا الامىن.
مەكتەپتە وقىپ جۇرگەن كەزىمنەن مەنى ونەرگە باۋلىپ، كوپتەگەن جارىستارعا قاتىستىرىپ، قولداپ ءجۇردى ۇنەمى. مەكتەپتى اياقتاعان سوڭ، از ۋاقىت ىشىندە جىلىويدىڭ بەلگىلى ءانشىسى جۇماباي بولەكبايەۆ اعامىزدان 15 شاقتى ءان ۇيرەنىپ، اتىراۋداعى ءدينا نۇرپەيىسوۆا اتىنداعى مۋزىكالىق كوللەدجگە كەلدىم. ەمتيحاندا 3-4 ءان سۇرادى. ءوتتىم. ءسويتىپ پاحامان قۇتتىمۇراتوۆتىڭ كلاسىنا قابىلدانىپ، ءتورت جىل وقىپ، ءبىتىرىپ شىقتىم.
- سوسىن؟
- ارمان قۋىپ الماتىعا كەلدىم. قۇرمانعازى اتىنداعى قازاق ۇلتتىق كونسەرۆاتورياسىنا، ساۋلە جانپەيىسوۆانىڭ كلاسىنا قابىلداندىم. ونى دا ءتورت جىل وقىپ، ۇزدىك ديپلوممەن ءبىتىردىم.
- ءداستۇرلى ءاننىڭ قۇدىرەتى نەدە؟
- ونىڭ قاسيەتىندە جانە ەرەكشەلىگىندە، كۇردەلىلىگىندە. ءداستۇرلى ءان - اتا-بابامىزدان كەلە جاتقان امانات. ۇرپاقتان ۇرپاققا ميراس بولىپ كەلە جاتقان ونەر. ءبىز سونى جالعاستىرۋشىمىز، ناسيحاتتاۋشىمىز.
- ءداستۇرلى ءان مەن ەسترادانى ۇشتاستىرۋعا كوزقاراسىڭىز قانداي؟
- قارسىلىق بىلدىرە المايمىن. تەك ءاندى بۇزباي ايتسا بولعانى... قازىر ءداستۇرلى ءانىمىزدى ەسترادامەن بايلانىستىرىپ ايتۋشىلار كوپ. ەكى باعىتتا ناسيحاتتاۋ دەپ تۇسىنەمىن. جانە ءداستۇرلى ءانشى ەسترادامەن ايتپاسىن دەگەن زاڭ جوق. ءانشى جان-جاقتى بولۋ كەرەك دەپ ويلايمىن. مەن دە ەسترادامەن ايتىپ ءجۇرمىن. ءبىراق ءداستۇرلى ءاندى ەشقاشان تاستامايمىن، باسقا ونەرگە ايىرباستاي دا المايمىن.
- قازىر قايدا قىزمەت اتقاراسىز؟
- استانا قالاسىنداعى پرەزيدەنتتىك وركەستردە باتىس ءوڭىرىنىڭ ءانشىسى بولىپ قىزمەت ەتەمىن. بۇل ورتادا قىزمەت ەتكەنىمە قۋانامىن. كوپ نارسەلەر ۇيرەنىپ تە ءجۇرمىن. وقىپ جۇرگەن كەزىمدە وسى ورىندا قىزمەت ەتسەم دەپ ارماندايتىنمىن. ەلميرا جاڭابەرگەنوۆا، مەدەت سالىقوۆ، كلارا تولەنبايەۆا، ارداق بالاجانوۆا سەكىلدى ونەر يەلەرىمەن بىرگە قىزمەت ەتىپ جۇرگەنىمە ماقتانامىن.
- باتىس مەكتەبىنىڭ تۇلەگىسىز عوي؟
- ءيا. كونسەرۆاتوريادا وقىپ جۇرگەنىمدە ەكى جۇزدەن اسا اندەر مەن جىر-تەرمەلەر ۇيرەندىم. ونىڭ ىشىندە تەك باتىس مەكتەبى عانا ەمەس، ارقا، جەتىسۋ، سىر مەكتەپتەرىنىڭ ءان-جىرلارى بار. سوندىقتان، رەپەرتۋارىمدا ەكى جۇزدەي ءان بار دەسەم بولادى. ەستىلمەي جۇرگەن اندەردى دە رەپەرتۋارىما قوستىم.
- ءداستۇرلى انشىلەر شەتەلگە كوپ شىعادى عوي؟
- ونىڭىز راس. مەن دە كوپ ەلدەردە بولدىم. تۇركيا، فرانسيا، اۆستريا، قىتاي، ەگيپەت، بىرىككەن اراب امىرلىكتەرى سەكىلدى مەملەكەتتەردى اتاپ ايتا الامىن. كەي جەرلەرگە ەكى-ءۇش رەت باردىم. باسقا ەلدىڭ ساحناسىندا ءان سالۋ - ۇلكەن باقىت! ناسيحاتتاپ جۇرگەنىمە، قازاق ءانىن تانىتىپ جۇرگەنىمە تەك قانا قۋانامىن. ءداستۇرلى ءانىمىزدىڭ ارقاسىندا ەل كورىپ، جەر كورىپ تە ءجۇرمىز. ونىڭ ءوزى نەگە تۇرادى؟ شەتەلدىكتەر قىزىعىپ سۇراقتار دا قويىپ جاتادى.
- كوبىنە قاي اندەردى ورىندايسىز؟
- كوبىنە حالىق اندەرىن ورىندايمىن. مىسالعا «بەۋ، ايداي»، «ادەمى قىز» دەگەن حالىق اندەرى. مۇحيتتىڭ اندەرىن دە ايتىپ جۇرەمىن. جەكە دە شىعامىن، كەيدە ەلىمىزدەن بارعان ونەرپازدارمەن بىرگە شىعامىز. ءار مەكتەپتىڭ اندەرىن تارتۋ ەتەمىز. ءسويتىپ، ۇلكەن-ۇلكەن انشىلەرىمىزبەن بىرگە، ءبىر ساحنادا ءان ايتىپ ءجۇرمىن.
- ال، ەسترادادا كىمدەرمەن بىرگە ءان ايتقىڭىز كەلەدى؟
- اقىلبەك جەمەنەي، تامارا اسار، اقبوت كەرىمبەكوۆا ەسىمدەرىن ايتا الامىن.
سۇحباتتاسقان ەلەنورا ءامىر
"شىن- اقپارات"
