گرۋزياداعى جول اپاتىنىڭ جيىلەۋى قازاقستاننان قالىسپايدى
بۇل ب ۇ ۇ-نىڭ تاراتقان مالىمەتى. ال گرۋزيادا جىلىنا 500 گە جۋىق ادام جول ۇستىندە جان تاپسىرادى. «گرۋزياداعى قاۋىپسىز جول اليانسىنىڭ» اقپاراتى بويىنشا، اپاتتا وپات بولعانداردىڭ سانى اۋىرىپ كوز جۇماتىنداردان الدەقايدا كوپ ەكەن.
جازاتايىم جول ۇستىندە جان تاپسىرۋ نەمەسە ساپ-ساۋ جۇرگەن ادامنىڭ مۇگەدەك بولىپ قالۋى ەلدە ۇلكەن پروبلەماعا اينالدى. سوڭعى كەزدە كولىكتەردىڭ ءبىر-بىرىمەن سوعىسۋى نەمەسە جاياۋ جۇرگىنشىنى باسىپ كەتۋ جيىلەدى. بۇگىندە 40 جاسقا دەيىنگى ءولىم-ءجىتىم بويىنشا اپاتتان وپات بولعاندار ەكىنشى ورىندى الادى.
گرۋزيادا جىل سايىن 500 ادام كولىكتىڭ سالدارىنان كوز جۇمادى.
مايا كوباليا، «گرۋزياداعى قاۋىپسىز جول اليانسىنىڭ» اتقارۋشى ديرەكتورى:
- جول اپاتىنىڭ جيىلەۋىنە كولىك تىزگىنىندە وتىرعانداردىڭ نەمقۇرايلىلىعى باستى سەبەپ. ويتكەنى اپاتتىڭ %95 ى ادامي فاكتوردىڭ كەسىرىنەن بولىپ جاتىر. تەك گرۋزيادا عانا ەمەس، بۇكىل الەمدە سولاي. ءبىز ەلدەگى جاعدايدى زەرتتەپ قانا قويمايمىز، سونىمەن قاتار مەملەكەتتىك ورگاندارعا ناقتى ۇسىنىسپەن شىعامىز. جەتىستىگىمىز دە بارشىلىق. ماسەلەن، 2014 -جىلعا دەيىن 3 رەت ايىپپۇل سالعان سوڭ عانا كولىك جۇرگىزۋ قۇقىعىنان ايىرىلسا، قازىر ەشقانداي ەسكەرتۋسىز ايىرىلادى.
جىل باسىنان بەرى ەلدە كولىكتەر سانى دا كۇرت كوبەيگەن. بۇگىندە ميلليوننان اسا تەمىر تۇلپار تىركەلىپتى. ياعني ءاربىر ءتورتىنشى تۇرعىننىڭ كولىگى بار دەگەن ءسوز. كوپ كولىككە قالا كوشەلەرى دە شىداس بەرەر ەمەس. جولداردىڭ تارلىعى، تۇراقتاردىڭ ازدىعى مەن ەسكىرگەن جول بەلگىلەرى اپاتتى ارتتىرۋدا.
داۆيد مەسحيشۆيلي، كولىك جانە جول قاۋىمداستىعىنىڭ جەتەكشىسى:
- ەسكىرگەن كولىكتەرگە باقىلاۋ كۇشەيسە، گرۋزيادا 350 مىڭ كولىك تەحنيكالىق بايقاۋدان وتە الماۋشى ەدى. اۆتوكولىككە دەگەن سۇرانىس قارقىندى تۇردە ءوسىپ جاتىر. بۇعان توسقاۋىل قويۋ كەرەك. ايتپەسە جول قاۋىپسىزدىگى تۋرالى ايتۋدىڭ ءوزى ارتىق.
ساراپشىلار تىعىرىقتان شىعۋدىڭ ءتۇرلى جولدارىن ۇسىنىپ الەك. بىرىنشىدەن، قولدانىستاعى كولىكتەرگە سۇرانىستى ازايتاتىن ناقتى شارالار قاجەت. ەكىنشىدەن، تەحنيكالىق بايقاۋدان ءوتۋدى زاڭمەن مىندەتتەۋ كەرەك. گرۋزيادا بۇل تالاپ 2017 -جىلى كۇشىنە ەنبەك.
www.24.kz
