استانانىڭ شەتىن سۋ باسىپ جاتىر - فوتو
قازىرگى كەزدە استانا قالاسىنا جاقىن ورنالاسقان قوسشى ەلدى مەكەنىندە توتەنشە جاعدايلار قىزمەتىنىڭ ماماندارى كۇن-ءتۇن دەمەي، ارنايى قۇلاقتاندىرۋ قۇرىلعىلارى بار كولىكپەن كوشەلەردى ارالاپ، جەرگىلىكتى حالىققا ەسكەرتۋ جاساپ ءجۇر. ول جاققا سۋ تاسقىنى تايتوبە جاقتان لاپ بەرۋى مۇمكىن.
سۋ سول اۋىلدىڭ شەتكى ۇيلەرىنە دەيىن جەتىپ قالدى. ءبىراق ونى قولدان جاسالعان بوگەت ۇستاپ تۇر. سوڭعى بەس كۇن بويى قۇتقارۋشىلار وسى جەردە كەزەكشىلىك اتقارىپ، سۋدىڭ دەڭگەيىن باقىلاپ وتىر. قازىر نۇرادان تاسىپ، دالاعا جايىلىپ كەتكەن سۋدىڭ دەڭگەيى بوگەتتىڭ ەرنەۋىنە دەيىن كوتەرىلگەن. ءبىز بارعاندا، توتەنشە جاعدايلار قىزمەتىنىڭ ماماندارى توسقاۋىلدىڭ ورتا تۇسىن كۇشەيتىپ، قۇمعا تولى قاپتاردى ءۇيىپ جاتقان. سەبەبى ول جەر بوساپ، جەردىڭ استىنان سۋ شىعا باستادى. ەكسكاۆاتوردا دا دامىل جوق.
ال نۇرانىڭ جوعارعى جاعىندا وتىرعان اۋىلداردى سۋ باسىپ جاتىر. ماسەلەن، راقىمجان قوشقاربايەۆ (بۇرىنعى رومانوۆكا) ەلدى مەكەنىنە باراتىن جولدا كوپىر بار. ونىڭ استىمەن نۇرا وزەنى اعىپ وتەدى. قازىر كەزدە سۋ كوپىردىڭ استىمەن اعىپ ۇلگەرمەي جاتىر. سونىڭ سالدارىنان جولدىڭ جيەگىمەن بىرنەشە شاقىرىمعا كول بولىپ، جايىلىپ كەتتى.
توتەنشە جاعدايلار قىزمەتىنىڭ ساربازدارى جولدىڭ بويىمەن توسقاۋىل جاساپ، قۇم سالىنعان قاپتاردى ءۇيىپ ءجۇر. ءۇش-ءتورت ساعاتتىڭ ىشىندە سۋ جولدىڭ ەرنەۋىنەن اسىپ كەتەدى دەگەن قاۋىپ بار. سول كەزدە ونى تولىعىمەن جاۋىپ تاستايدى. جەرگىلىكتى حالىقتىڭ ايتۋىنشا، ءدال قازىر سۋ راقىمجان قوشقاربايەۆ ەلدى مەكەنىنىڭ شەتىنە دەيىن جەتكەن. ال وعان قاراستى اعاناس دەگەن بولىمشەنى تولىعىمەن باسىپ قالدى.
«اعاناستا سۋ دەڭگەيى ءۇيدىڭ تەرەزەسىمەن بىردەي بولىپ تۇر. شىنەت دەگەن بولىمشەگە دە كىرىپ جاتىر. قازىر رومانوۆكاعا باراتىن جولدى سۋ باسسا، حالىق شىعا الماي قالادى. نۇرانىڭ تولقىنى قاتتى. جولدان ءوتىپ بارا جاتقاندا، قورقىپ وتىراسىن»، - دەيدى جەرگىلىكتى پوشتا بولىمشەسىنىڭ مامانى.
P. S. ءبىز قالاعا قايتىپ بارا جاتقاندا، توتەنشە جاعدايلار قىزمەتى ۇرلەمەلى رەزەڭكە قايىقتارىن دايارلاپ، وزەن سۋى تاسىپ جاتقان جەرلەرگە اپارىپ جاتتى.
اۆتور: ارمان اسقار
«الاش ايناسى»
