الماتىعا كەلگەن سايىن ونىڭ قارىشتاپ دامىپ جاتقانىن كورىپ قۋانامىن - ن. نازاربايەۆ

الماتى. قازاقپارات - «الماتىعا ءار كەلگەن سايىن ونىڭ قارىشتاپ دامىپ جاتقانىن كورىپ قۋانامىن. الماتى - قازاقستاننىڭ ەڭ ءىرى جانە ەڭ اسەم قالاسى!» ەلباسى نۇرسۇلتان نازاربايەۆ بۇگىن الماتى قالاسىنىڭ الاتاۋ اۋدانىندا ورنالاسقان جاڭا «الاتاۋ» كينو-كونسەرت زالىنىڭ الدىندا اۋدان تۇرعىندارىمەن بولعان كەزدەسۋدە وسىلاي دەدى.

«الماتىنى بارلىق قازاقستاندىقتار جاقسى كورەدى. قالانىڭ بۇدان دا بەتەر كوركەيۋىنە مەملەكەت كۇش سالىپ جاتىر. قازىر ەكولوگيالىق ماسەلەلەر بىرتىندەپ شەشىلۋدە. ءبىز بۇگىن قوسىمشا ەكى مەترو ستانساسىن اشتىق. 2011-جىلدان بەرى الماتى مەتروسى 20 ميلليون جولاۋشىنى تاسىمالداپتى. ال كۇن سايىن 25 مىڭ ادامدى تاسىمالدايدى. سونىمەن قاتار، سۇيىتىلعان گازبەن جۇرەتىن اۆتوبۋستار، تاكسيلەر قاتىناپ جاتىر. مۇنىڭ بارلىعى ەكولوگيانى جاقسارتۋعا سەپتىگىن تيگىزەدى»، - دەدى ەل پرەزيدەنتى.

سونىمەن قاتار، ەلباسى قالانىڭ، ەلدىڭ دامۋىندا ۇلتارالىق تاتۋلىقتىڭ، دوستىقتىڭ ۇلكەن رول اتقاراتىندىعىن اتاپ ءوتتى.

«قازىرگى جەتكەن جەتىستىكتەرىمىزگە بىرلىگىمىزدىڭ، دوستىعىمىزدىڭ ارقاسىندا قول جەتكىزىپ وتىرمىز. دوستىق - بەرەكە- بىرلىكتىڭ نەگىزى. تۇراقتىلىق بار جەردە دامۋ بولادى. ال تۇراقتىلىق جوق جەردە نە بولاتىنىن وزدەرىڭىز دە كورىپ، ءبىلىپ جۇرسىزدەر. قان توگۋگە دەيىن بارادى. سوندىقتان بىزگە تۇراقتىلىق كەرەك. ال الماتى بۇدان كەيىن دە قارىشتاپ داميتىن بولادى. بۇل جەردە تاماشا ءبىلىم الۋعا، جۇمىس ىستەۋگە مۇمكىندىك بار. ەڭبەك ەتەتىن، تۋعان قالاسىن سۇيەتىن ادام قالادا تىنىشتىقتىڭ، تۇراقتىلىقتىڭ بولعانىنا كۇش سالادى. الماتى تاۋەلسىزدىك جىلدارى كوركەيە ءتۇستى. سوندىقتان قالانىڭ بۇدان كەيىن دە دامي بەرۋىنە تىلەكتەسپىن. الماتىلىقتارعا دەنساۋلىق، بەرەكە- بىرلىك جانە جاڭا تابىستار تىلەيمىن»، - دەدى ەلباسى ن. نازاربايەۆ.

اۆتور: جاپپاربەرگەن ايبوتا