گرەك-ريم كۇرەسىنەن ازيا چەمپيوناتىنا ۇكىلەپ قوسار جىگىتتەرىمىز

استانا. قازاقپارات -گرەك- ريم كۇرەسىنەن قازاقستان ۇلتتىق قۇراماسىنىڭ باپكەرلەر كەڭەسى دە ازيا چەمپيوناتىندا بەلدەسەتىن بالۋاندارىمىزدىڭ ەسىمدەرىن مالىمدەدى.

6-10- مامىر ارالىعىندا كاتار استاناسى دوحادا وتەتىن ازيا بىرىنشىلىگىندە گرەك-ريم كۇرەسىن دە ەلىمىزدىڭ نامىسىن بيىلعى چەمپيوندارىمىز قورعايدى. تەك ءبىر سالماقتا عانا دوحا كىلەمىنە ەل چەمپيونى شىقپايدى. ناقتىراق ايتقاندا، 75 كەلى سالماق دارەجەسىندە قۇراما ساپىنا داۋلەت جاقسىلىقوۆ الىنىپتى.

گرەك-ريم كۇرەسىنەن قازاقستان ۇلتتىق قۇراماسىنىڭ باس باپكەرى تاڭات ساعىندىقوۆتىڭ مالىمدەۋىنشە، 75 كەلىدەگى ەل چەمپيونى دوسجان قارتىقوۆ جاراقاتتانىپ قالعان. ال تالدىقورعان بوز كىلەمىندە كۇمىس جۇلدەگەر اتانعان ماقسات ەرەجەپوۆ سپورتتىق بابىنا كەلە الماي جۇرگەن كورىنەدى.

قولا جۇلدەگە يە بولعان ەكى بالۋاننىڭ ءبىرى، ياعني اسحات دىلمۇحامەدوۆ 80 كەلى سالماق دارەجەسىنە اۋىسىپ كەتكەن. ال دانيال گادجييەۆ بولسا، جاراقاتىنان ءالى ايىقپاعان.

سوندىقتان باپكەرلەر كەڭەسى بۇل سالماقتا داۋلەت جاقسىلىقوۆقا سەنىم ارتقاندى ءجون ساناپتى. ءبىر قىزىعى، جەتىسۋ تورىندەگى ەل چەمپيوناتىندا داۋلەت 80 كەلى سالماق دارەجەسىندە بەلدەسكەن. ول اسكەريلەر اراسىنداعى الەم چەمپيوناتىندا كۇمىس جۇلدەگەر اتانىپ، پرەزيدەنت كۋبوگىندا جۇلدەگە ىلىككەن. ەندى وعان تاماشا مۇمكىندىك بەرىلىپ، ۇلسكەن سەنىم ارتىلىپ وتىر.

جالپى، گرەك-ريم كۇرەسىنەن قازاقستان ۇلتتىق قۇراماسىنىڭ باس باپكەرى دوحاداعى ازيا چەمپيوناتىنان ءۇش-ءتورت جۇلدە ولجالاۋدى، ونىڭ ءبىرى التىن بولسا دەگەن جوسپارلارى بار ەكەندىگىن دە تىلگە تيەك ەتكەن.

ەندى گرەك-ريم كۇرەسىنەن قۇرلىق بىرىنشىلىگىندە ەل نامىسىن قورعاۋ مارتەبەسىنە يە بولعان بالۋاندار تىزىمىمەن تانىسىڭىزدار:

59 كەلى: مەيرامبەك ايناعۇلوۆ

66 كەلى: دەمەۋ جادىرايەۆ

71 كەلى: ازامات ءدۇمبىروۆ

75 كەلى: داۋلەت جاقسىلىقوۆ

80 كەلى: جاسۇلان قوشانوۆ

85 كەلى: نۇرسۇلتان تۇرسىنوۆ

98 كەلى: مارعۇلان اسەمبەكوۆ

130 كەلى: نۇرماحان تىناليەۆ

اۆتور: ايقىن جاپپار

«الاش ايناسى»