سەمەيدە قازاق جۇلدىزدارىنىڭ كونسەرتىنەن شۋ شىقتى
وقيعا 16- ساۋىردە بولدى. انشىلەر سەمەي قالاسىنىڭ ورتالىق الاڭىندا كونسەرت قويۋى كەرەك بولعان. الايدا كۇن رايىنىڭ قولايسىزدىعىنا بايلانىستى كونسەرت مادەنيەت ءۇيىنىڭ ىشىنە اۋىستىرىلعانى جايلى مالىمەت تارادى. 450 ورىندىق مادەنيەت ۇيىنە قالا حالقى سىيماعاندىقتان، ونەرپازدار ءۇش بىردەي تەگىن كونسەرت بەرۋگە ءماجبۇر بولدى. دەسە دە، سىرتتا كۇتە-كۇتە توزىمدەرى تاۋسىلعان كورەرمەن ەسىكتى قيراتىپ، ءتارتىپ ساقشىلارىنا قارسى شىقتى.
تەلەارنا تىلشىلەرىنىڭ ايتۋىنشا، پوليتسەيلەر گاز باللوندارىن قولدانۋعا ءماجبۇر بولدى. ۇلتتىق ۇلاننىڭ قوسىمشا ساربازدارى دا شاقىرىلعان.
كونسەرتتە ونەر كورسەتكەن «مۋزارت» توبىنىڭ ءانشىسى ساكەن مايعازيەۆ Instagram جەلىسىندە بۇل كەلەڭسىزدىكتى ۇيىمداستىرۋشىلاردىڭ تالابى دەپ ءتۇسىندىردى. «سەمەيلىكتەرگە العىسىمىز شەكسىز! كونسەرتكە كىرە الماعانداردان كەشىرىم سۇرايمىز. «ەلگە كەلىپ تۇرىپ، نەگە ءبىر اۋىز قۇلاققاعىس جاساي سالمايدى.. .» دەمەسىن دەپ، كونسەرت تۋرالى حاباردار ەتسەم دە جاقپادىم. «قوناق قويدان جۋاس» دەيدى قازاق. ونەرپازدارىمىز -15-20 گرادۋس سۋىقتا دا ءانى مەن ءازىلىن ايتىپ كەلە جاتىر. ەشكىم «جاۋرايمىز، دالادا ءان ايتپايمىز» دەگەن جوق. ۇيىمداستىرۋشىلاردىڭ تالابى سولاي بولدى»، - دەدى ءانشى.
