ەلورداداعى قوعامدىق كولىكتەردە تەگىن ينتەرنەت ىسكە قوسىلادى
2015-جىلدىڭ 17- ساۋىرىندە استانا قالاسى اكىمىنىڭ ورىنباسارى ءنۇرالى اليەۆ « Beeline قازاقستاننىڭ» باس ديرەكتورى تاراس پارحومەنكومەن كەزدەسۋ وتكىزدى.
كەزدەسۋ بارىسىندا «Beeline قازاقستان» كومپانياسى ۇستىمىزدەگى جىلى ەلوردانىڭ 100 قوعامدىق كولىگىندە تەگىن ينتەرنەت جۇيەسىن ىسكە قوساتىنى تۋرالى كەلىسىلدى. اعىمداعى جىلدىڭ 1- شىلدەسىنەن باستاپ 50 قالالىق اۆتوبۋس جولاۋشىلارى تەگىن ينتەرنەتپەن قولدانا باستاسا، 1- قازاننان باستاپ تاعى 50 اۆتوبۋستا تەگىن ينتەرنەت ىسكە قوسىلادى.
- بۇگىندە سمارتفوندار مەن پلانشەتتەردى پايدالانۋ دەڭگەيى كۇن ساناپ ارتىپ كەلە جاتقاندىقتان، ەلوردا تۇرعىندارى ءۇشىن ءموبيلدى ينتەرنەتتىڭ كەز كەلگەن جەردە قولجەتىمدى بولۋىنا قاجەتتىلىك تۋىنداپ وتىر. اتالعان جوبانىڭ باسىمدىلىعى - جولاۋشىلاردىڭ بارلىعىنا بىردەي قولجەتىمدى بولۋىندا جانە بۇل رەتتە ولاردىڭ قاي بايلانىس وپەراتورىنىڭ قىزمەتىن پايدالاناتىنى ماڭىزدى ەمەس، - دەدى اكىم ورىنباسارى ن. اليەۆ.
جوبانىڭ سەرىكتەستەرى - استانا اكىمدىگىنە قاراستى مەكەمەلەر: «استانا Innоvations» ا ق يننوۆاتسيالىق دامۋ وپەراتورى جانە ەلوردانىڭ كولىك ينفراقۇرىلىمى دامۋىنىڭ وپەراتورى «استانا LRT» ج ش س، دەپ حابارلايدى astana. kz.
