سەربيا پرەزيدەنتىنىڭ ۇشاعى اپاتتى جاعدايدا قوندى

استانا. قازاقپارات - سەربيا پرەزيدەنتى توميسلاۆ نيكوليچتىڭ ۇشاعى دۆيگاتەلىندەگى اقاۋلىققا بايلانىستى بەلگراد اۋەجايىنا ورالۋعا ءماجبۇر بولدى، دەپ حابارلايدى ۆەستي.

مەملەكەت باسشىسى 17- ساۋىردە ۆاتيكانعا بارۋى ءتيىس بولاتىن، الايدا، ۇشاعىنىڭ تەحنيكالىق اقاۋلارىنا بايلانىستى ونىڭ بۇل ساپارى كەيىنگە قالدىرىلدى. پرەزيدەنتتىڭ كەڭەسشىسى ستانيسلاۆا پاك ونىڭ ساپارىنىڭ ازىرگە ناقتى بەلگىسىز مەرزىمگە كەيىنگە قالدىرىلعانىن راستادى.

بەيرەسمي مالىمەتتەرگە سۇيەنسەك، «فالكون-50» ۇشاعىنىڭ دۆيگاتەلدەرىنىڭ ءبىرى ادريات تەڭىزىنىڭ ۇستىنەن ۇشۋى كەزىندە ىستەن شىققان. بۇل كەزدە ول 10 مىڭ مەتر بيىكتىكتە ۇشىپ بارا جاتقان ەدى. تاجىريبەلى ۇشقىشتىڭ اۋە كەمەسىن باسقارۋدى باقىلاي الۋىنىڭ ارقاسىندا ول بەلگرادقا قايتا ورالعان.