08:28, 18 - ءساۋىر 2015 | GMT +5
جول اپاتى سالدارىنان ميلليونداعان ارا ءوز بالىنا باتىپ كەتكەن
استانا. قازاقپارات - فرانسيانىڭ وڭتۇستىگىندە ورىن العان جول اپاتى سالدارىنان ميلليوننان استام ارا قىرىلىپ قالدى. بۇل تۋرالىThe Local حابارلايدى.
ءارقايسىسىندا 20 مىڭعا جۋىق ارا بولعان ۇياشىقتاردى تاسىمالداپ كەلە جاتقان جۇك كولىگى سوسناك قالاسىنىڭ ماڭىندا جەڭىل كولىكپەن سوقتىعىسقان. سوققى سالدارىنان ۇياشىقتار سىنىپ، ارالاردىڭ كوبى ءوز بالىنا باتىپ قىرىلىپ قالعان.
ءتىرى قالعان ونداعان مىڭ ارا وقيعا ورنىنا كەلىپ جەتكەن پوليتسەيلەر مەن قۇتقارۋشىلارعا شابۋىلدادى. الدىن الا مالىمەتتەر بويىنشا، اپاتتان كەلتىرىلگەن شىعىن سوماسى 7 مىڭنان استام ەۋرونى قۇراعان.
ايتا كەتەيىك، فرانسيا ەۋروپالىق ومارتا شارۋاشىلىعى ورتالىقتارىنىڭ ءبىرى بولىپ تابىلادى. الدىن الا باعالاۋ بويىنشا، ەلدە 69 مىڭنان استام ومارتاشى بار. نەگىزگى بال ءوندىرىسى كليماتى ومارتاشىلىقپەن جىل بويى اينالىسۋعا مۇمكىندىك بەرەتىن ەلدىڭ وڭتۇستىك-باتىسىندا - جەرورتا تەڭىزىنىڭ جاعالاۋىندا جاقسى دامىعان.
