ەلوردادا «ايالاعان استانا» بايقاۋىنىڭ ىرىكتەۋ كەزەڭى وتەدى
بايقاۋ ۇيىمداستىرۋشىلارى حابارلاعانداي، ىرىكتەۋ كەزەڭدەرى الماتى، تاراز، تالدىقورعان، شىمكەنت، وسكەمەن، پەتروپاۆل، قىزىلوردا، پاۆلودار، كوكشەتاۋ، قوستاناي، ورال قالالارىندا ءوتتى. كاستينگكە 400 دەن استام بالا قاتىستى.
بيىلعى بايقاۋ قازاقستان حالقى اسسامبلەياسى جىلىنا ارنالعان. ونى استانا قالالىق اكىمدىگى مەن بەلگىلى رەسەيلىك «ارس» كومپانياسى «قازاقستان» ۇلتتىق تەلەارناسىنىڭ قولداۋىمەن ۇيىمداستىرىپ وتىر. بايقاۋدىڭ باستى ماقساتى - قازاقستان بويىنشا دارىندى بالالاردى ىزدەپ، ولاردىڭ شىعارماشىلىعىنا ارى قاراي قولداۋ كورسەتۋ.
كاستينگتەر قورىتىندىسى بويىنشا، بايقاۋعا فينالعا وتكەن 12 ونەرپاز قاتىسادى، ولار جازعى دەمالىس ۋاقىتىندا استاناعا كەلىپ، تەليەۆيزيالىق شوۋدىڭ دايىندىعىنا قاتىسىپ، ۆوكالدىق، اكتەرلىك شەبەرلىك، حورەوگرافيا جانە وركەسترمەن جۇمىس ىستەۋدى ۇيرەنە الادى.
بايقاۋدىڭ فينالى 2015-جىلدىڭ 4-6- شىلدە ارالىعىندا، استانا كۇنىن تويلاۋ كۇندەرى «قازاقستان» ۇلتتىق تەلەارناسىنىڭ تىكەلەي ەفيرىندە كورسەتىلەدى.
«ايالاعان استانا» جەڭىمپازى حالىقارالىق «دەتسكايا نوۆايا ۆولنا-2015» بايقاۋىندا قازاقستاننىڭ نامىسىن قورعاۋ مۇمكىندىگىنە يە بولادى.
