ۇلى بريتانيانىڭ زەينەتاقى جۇيەسى ۇلكەن وزگەرىسكە ۇشىراپ جاتىر
كەيبىرەۋلەر اتالعان رەفورما قاريالار ءۇشىن زور مۇمكىندىكتەرگە جول اشادى دەپ ەسەپتەسە، باسقالارى جاڭا زاڭ ميلليونداعان ادامعا كەدەيشىلىك كەبىن كيگىزەدى دەپ بايبالام سالۋدا.
73 جاستاعى بۇرىنعى اۆتوبۋس جۇرگىزۋشىسى نورمان جەكەمەنشىك قورعا جيناعان زەينەتاقىسىن الىپ ءجۇر . نەگىزى جاڭا زاڭ وسىنداي ادامدار توبىنا باعىتتالعان. ەندى مەملەكەتتىك ەمەس زەينەتاقىسى بار كەز كەلگەن بريتانيالىق جيناعان بارلىق اقشاسىن الىپ، ءوز قالاۋى بويىنشا جۇمساي الادى .
نورمان، حارتفوردشير گرافتىعىنىڭ تۇرعىنى - بۇل زاڭ ماعان مۇلدە ۇنامايدى . ارينە، ءبىز تىرنەكتەپ جيعان زەينەتاقىمىزدى ەمىن - ەركىن پايدانالۋعا زور مۇمكىندىك الامىز . ءبىر جاعىنان جيناپ - تەرگەن اقشامىزدى ءبىر ساتتە جۇمساپ تاستاپ، تۇكسىز قالۋعا دا بولادى. قازىر قارت ادامدار جيناعان اقشالارىن قالاي جۇمساۋ كەرەكتىگىن جوسپارلاپ جاتىر . ساۋالناماعا قاتىسقانداردىڭ 25 پايىزى ادەمى كولىك ءمىنىپ نەمەسە مۇحيتقا ساپارعا شىعۋعا نيەتتى ەكەن. مۇنداي جوسپار بريتانيالىق تۋريستىك كومپانيالاردىڭ قارجىسىن مولايتقالى تۇر .
بۇدان باسقا، اس ءۇي بۇيىمدارىن، جيھاز بەن سانتەحنيكا زاتتارىن ساتاتىنداردىڭ اسىعى الشىسىنان تۇسپەك. ال زاڭعا قارسى توپ قاريالار ەڭكەيگەن شاعىندا ەسىل اقشانى وڭدى - سولدى شاشىپ، تۇبىندە كوك تيىنسىز قالىپ، مەملەكەتكە ماسىل بولۋى مۇمكىن دەپ دابىل قاعۋدا .
ليندا ، زەينەتكەر - ادامدارعا بارلىق جيعان - تەرگەنىن بىردەن شاشىپ تاستاۋعا مۇمكىندىك بەرۋ وتە اقىلسىز قادام دەپ ەسەپتەيمىن. زەينەتكەرلەرگە اقشاسىن اقىلمەن جۇمساۋعا، ءتىپتى پايدالى ىسكە سالىپ، تابىس تابۋعا كەڭەس بەرەتىن ورتالىقتار جۇمىس ىستەۋى كەرەك.
الايدا جاڭا زاڭنىڭ يگىلىگىن بارلىق قاريالار كورە المايتىن ءتۇرى بار . ستاتيستيكا بويىنشا ، 1 جارىم ميلليون بريتانيالىق كەدەيشىلىك قامىتىن كيگەن، ال ءبىر ميلليونداي زەينەتكەر تويىپ تاماق جەمەيدى، ولار تەگىن اس بەرەتىن ورتالىقتارعا بارىپ، جۇرەك جالعايتىن كورىنەدى. جاستاردىڭ دا بولاشاعى بۇلىڭعىر . ولاردىڭ 20 پايىزىندا ەشقانداي زەينەتاقى سالىمى جوق، ايلىعىن ارەڭ جەتكىزىپ ءجۇر . سەبەبى قوسىمشا اقشا جيناۋعا قىمباتشىلىق مۇرسات بەرمەيدى.
