ا ق ش پەن جاپونيا اراسىنداعى سەنىمدى دوستىقتىڭ سيمۆولى - فوتو
قالا تۇرعىندارىن بىلاي قويىپ، وزگە ەلدەردەن ارنايى ساپار جاسايتىن جيھانكەزدەر دە جەتىپ ارتىلادى .
جىل سايىن پوتوماكتىڭ جاعاسىن تاڭعاجايىپ تۇرگە بولەيتىن ءبىر عانا وقيعا بار. ول - ساكۋرانىڭ گۇلدەۋى. اسەم اعاشتىڭ گۇل جارۋى ۆاشينگتونعا ناعىز كوكتەم كىرگەنىن بىلدىرەتىن تاماشا ءداستۇر قالىپتاسقان. ەڭ باستىسى بۇل وقيعا ا ق ش پەن جاپونيا اراسىنداعى سەنىمدى دوستىقتىڭ سيمۆولىنا بالانىپ كەلەدى. ولاي بولاتىن ءجونى بار. 1912 - جىلى توكيو مەرى يۋكيو وزاكي اراداعى دوستىقتىڭ نىشانى رەتىندە ۆاشينگتونعا 3 مىڭ ءتۇپ شيە اعاشىن سىيعا تارتۋ ەتتى. كوشەتتەر امەريكا جەرىنە تامىر جايىپ ۇلگەرگەن بويدا، كوپ ۇزاماي مىزعىماس دوستىققا سىزات ءتۇستى . 1941 - جىلدىڭ 7 - جەلتوقسانىندا جاپونيانىڭ 183 بومبالاعىش ۇشاعى كۇتپەگەن جەردەن ا ق ش - تىڭ گاۆاي ارالدارىندا ورنالاسقان پەرل - حاربور اسكەري - تەڭىز بازاسىنا شابۋىل جاسادى .
اسكەري وپەراتسيا امەريكالىقتاردى زور شىعىنعا باتىردى. ەرتەسىنە - اق ا ق ش جاپونياعا قارسى سوعىس جاريالادى . تىنىق مۇحيتىنداعى كەسكىلەسكەن شايقاستار اقىرى 1945 - جىلى امەريكانىڭ حيروسيما مەن ناگاساكيگە تاستاعان اتوم بومباسىمەن اياقتالدى. ال ساكۋرا اعاشىندا جازىق جوق. جات ەلگە جەرسىنگەن ولاردىڭ سانى قازىر 4 مىڭنان اسىپ جىعالادى. بۇگىندە « دوستىق اعاشى » امەريكالىقتار مەن جاپوندىقتاردىڭ عانا ەمەس، الەمنىڭ ءار تۇكپىرىنەن اعىلعان سان مىڭ ساياحاتشىنىڭ ساپارىنا سەبەپشى.
حالىقتىڭ ءدال وسى ءساتتى كوپتەن تاعاتسىز كۇتكەنى راس. شيە تالىنىڭ تۇبىنەن سايا تاپقىسى كەلەتىندەردىڭ ەڭ الدىمەن ونىڭ القىزىل، اق ۇلپەك گۇلىنە قۇمارى ارتاتىنى انىق. اسىرەسە پوتوماك وزەنىمەن ۇيلەسكەن كورىنىستىڭ ءوزى نەگە تۇرادى؟! مۇندا كەلۋشىلەر قايىقپەن سەرۋەندەپ، سۋرەتكە ءتۇسىپ، ءتىپتى ماڭداعى مەيرامحانالاردان شيە شايىنە ءشول باسادى. ۇلتتىق ساياباق اۋماعىندا 1935 - جىلدان بەرى ءداستۇرلى تۇردە « جاپون فەستيۆالى» وتكىزىلىپ كەلەدى. قالا قوناقتارى مەن جيھانكەز قاۋىم ونى 3 اپتا بويى تاماشالايدى . فەستيۆال اياسىندا 50 گە تارتا كوڭىلدى ءىس - شارالار وتكىزىلىپ، شيە گۇلىن كورۋگە ميلليوننان استام ادام كەلەدى دەپ كۇتىلۋدە .
www.khabar.kz
