ەۋروپانىڭ ءبىرقاتار مەملەكەتتەرى قايتادان زەينەتاقى جاسىن ۇلعايتۋدى قاراستىرۋدا

استانا. قازاقپارات -  ەۋروپانىڭ ءبىرقاتار مەملەكەتتەرى قايتادان زەينەتاقى جاسىن ۇلعايتۋدى قاراستىرۋدا. جاڭا رەفورمانىڭ قابىلدانعالى جاتقانىنا قاتىستى ۇندەمەي كونە سالمايتىن ەۋروپالىقتار ءوز نارازىلىقتارىن بىلدىرۋدە. فرانسيادا بىرنەشە كۇنگە سوزىلعان قارسىلىق اكسياسى ءالى تولىعىمەن باسىلعان جوق. ماقسات تولىقبايدىڭ پاريجدەن ارنايى رەپورتاجى.

 فرانسيا زەينەت جاسىن ۇلعايتۋعا امالسىزدان بارىپ وتىر. الەمدىك قارجى داعدارىسى ەۋروپالىق مەملەكەتتەردىڭ ءبىرازىن ەسەڭگىرەتتى.

 بىزدەن كوشى الدەقايدا ىلگەرى سانالاتىن گەرمانيانىڭ ءوزى 2019- جىلعا دەيىن بىرتىندەپ زەينەتكە شىعۋ مەجەسىن 65 تەن 67 جاسقا ۇلعايتۋدى جوسپارلاسا، يتاليا بىلتىردان باستاپ ايەلدەردىڭ زەينەتكە شىعۋ جاسىن بىردەن 65 كە كوتەردى. ال، فرانسيادا ءبىر قىزىعى، زەينەتكە شىعۋ جاسىندا ايەلدەر مەن ەر ازاماتتاردىڭ اراسىندا ەشقانداي ايىرماشىلىق جوق. بارلىعى ءبىر جاستا شىعادى ەكەن.

بەنەديكت نيكوليا، پاريج قالاسىنىڭ تۇرعىنى:

 زەينەتكەرلىككە 60 جاستا شىعىپ كەلگەن فرانسۋزدار 2012 - جىلى ۇكىمەتتىڭ بۇل كورسەتكىشتى 62 جاسقا كوتەرمەك ويىنا قارسىلىق بىلدىرگەن بولاتىن. ال، بۇگىندە فرانسيا پارلامەنتى بۇكىل ەل جاپپاي قارسىلىق بىلدىرگەن زەينەت جاسىن 65 كە ۇلعايتۋ تۋرالى زاڭ جوباسىن ماقۇلداپ وتىر.

 جاڭا رەفورما بويىنشا، زەينەتكە شىعۋ جاسى بىردەن ەمەس، قازاقستانداعىداي بىرتىندەپ ءوسىپ، 2018 - جىلى اياقتالماق. ال، 2030 - جىلعا قاراي 67 جاس بولماق. الايدا، «مۇنداي وزگەرىسكە جول بەرمەيمىز» دەگەن ەلدەگى كاسىپوداقتار كوشەلەردىڭ ورتاسىندا شەرۋلەتىپ، نارازىلىق ءبىلدىرىپ جاتىر.

جاڭا رەفورما بيۋدجەتتى ۇنەمدەيتىنىنە ۇكىمەت سەنىمدى. ويتكەنى، بۇل ەلدىڭ زەينەتاقى مولشەرىن ءبىزدىڭ ەلمەن سالىستىرۋعا مۇلدەم كەلمەيدى. بىرنەشە ەمەس، ون ەسە جوعارى.

 زەينەتاقىنىڭ مولشەرىنىڭ كوپتىگىنەن بولەك، وعان باتىس ەۋروپا تۇرعىندارىنىڭ 80-90 جاس جاسايتىنىن قوسىڭىز. سونداي- اق، دۇنيەگە ءبىر سابيدەن ارتىق بالا اكەلمەۋ پروبلەماسىن قوسساق، جۇمىس ىستەۋشىلەردىڭ سانى زەينەتكەرلەر قاتارىنان كەمىپ بارا جاتقانى جانە بار. سوندىقتان، فرانسيا بيلىگىنىڭ كەرى قادامعا بارۋى ەكىتالاي سياقتى.

«31-ارنا»