قىتايعا قازاقتىڭ ەڭ مىقتى قىز-كەلىنشەكتەرى بارا جاتىر

استانا. قازاقپارات - شاحماتتان قازاقستاننىڭ قىز-كەلىنشەكتەر قۇراماسى قىتايدا وتەتىن كوماندالىق الەم بىرىنشىلىگىنە اتتاندى، دەپ جازادى «الاش ايناسى» ينتەرنەت- پورتالى.

18 جانە 28- ءساۋىر ارالىعىندا قىتايدىڭ چاندۋ قالاسىندا وتەتىن بىرىشىلىكتە ءبىزدىڭ ەلدىڭ نامىسىن دينارا ءسادۋاقاسوۆا، جانسايا ابدىمالىك، گۇلىسحان ناحبايەۆ، گۇلميرا داۋلەتوۆا جانە ءمادينا داۋلەتبايەۆا قورعايدى.

بىرىنشىلىك بارىسىندا شاحماتشىلارىمىزدىڭ دايىندىعىن ەكى باپكەر - پاۆەل كوتسۋر مەن سەرىكباي تەمىربايەۆ باقىلاپ جۇرەتىن بولسا، حالىقارالىق دارەجەدەگى بەلارۋسسيالىق گروسسمەيستەر الەكسەي الەكساندروۆ قىزدارىمىزعا كەڭەس بەرىپ وتىرادى.

ايتا كەتەيىك، شاحماتتان قىز-كەلىنشەكتەر اراسىنداعى الەم بىرىنشىلىگىن بۇعان دەيىن قىتاي ءۇش مارتە قابىلداسا، ۋكراينا جانە قازاقستان ءبىر-ءبىر رەتتەن قابىلداعان. بەسىنشى مارتە وتكەلى جاتقان بىرىنشىلىكتى قابىلداۋ قۇقىعى قايتا «اسپان استى» ەلىنە بۇيىرىپتى.

الەم چەمپيوناتىنىڭ تاريحىنا ۇڭىلەتىن بولساق، العاشقى ءۇش بىرىنشىلىكتى قىتاي قۇراماسىنىڭ قىزدارىنىڭ مەرەيى ۇستەم بولعانىن كورەمىز. ءبىراق، 2013-جىلى ەلوردامىز استانا قالاسىندا وتكەن الەم چەمپيوناتىندا ۋكراينا قۇراماسىنىڭ ارۋلارى الەم چەمپيوندارى اتانعان ەدى.

قازاقستان قۇراماسى قىز-كەلىنشەكتەر اراسىنداعى كوماندالىق الەم بىرىنشىلىگىنە وسىمەن ەكىنشى رەت قاتىسقالى وتىر. بۇعان دەيىن ءبىزدىڭ قۇراما 2013-جىلعى الەم بىرىنشىلىگىندە باقتارىن سىناپ، جالپى ەسەپتە 7-ورىنعا تۇراقتاعان بولاتىن. قۇرامانىڭ باپكەرى پاۆەل كوتسۋردىڭ ايتۋىنا قاراعاندا، قىتايدا ءبىزدىڭ قۇرامانىڭ الدىنا ۇزدىك بەستىكتىڭ قاتارىنا قوسىلۋ دەگەن ماقسات قويىلعان. ەگەر، بۇل تاپسىرما ورىندالسا، ءبىز ءۇشىن ۇلكەن جەتىستىك بولادى.

جالپى بيىلعى بىرىنشىلىككە قازاقستان، قىتاي، ۋكراينا، پولشا، گرۋزيا، ارمەنيا، ءۇندىستان، رەسەي، ا ق ش، ەگيپەت سىندى 10 ەلدىڭ شاحماتشىلارى قاتىسادى.

اۆتور: ۋاليحان قوسانباي