اۋە شابۋىلىنا قارسى قازاقستان مەن رەسەي قورعانىسىنىڭ ءبىرىڭعاي وڭىرلىك جۇيەسى قۇرىلادى
بۇل تۋرالى ماسكەۋدە ق ر قورعانىس ءمينيسترى يمانعالي تاسماعامبەتوۆ ءوزىنىڭ رەسەيلىك ارىپتەسى سەرگەي شويگۋمەن كەزدەسۋى بارىسىندا ءمالىم ەتتى، دەپ جازادى ر ي ا نوۆوستي.
«قازاقستان مەن رەسەيدىڭ اۋە شابۋىلىنا قارسى قورعانىسىنىڭ ءبىرىڭعاي وڭىرلىك جۇيەسىن قۇرۋ ماسەلەسىنە قاتىستى بارلىق زاڭ پروتسەدۋرالارى اياقتالىپ، جۇيەنى ءىس جۇزىندە قۇرۋ ماسەلەسى العا شىقتى»، - دەدى ي. تاسماعامبەتوۆ.
ول سونداي-اق اتالمىش جۇيەنى باسقارۋشىنىڭ ازىرگە تاعايىندالماعانىن، الايدا وعان ۇمىتكەرگە قاتىستى شەشىمگە رەسەي پرەزيدەنتىنىڭ قول قويعانىن، قۇجاتقا جاقىن ارادا قازاقستاننىڭ مەملەكەت باسشىسىنىڭ دا قولى قويىلاتىنىن جەتكىزدى.
بۇدان بۇرىن حابارلانعانداي، اۋە شابۋىلىنا قارسى قورعانىسىنىڭ ءبىرىڭعاي وڭىرلىك جۇيەسىنىڭ اسكەرىن قازاقستان جانە رەسەي پرەزيدەنتتەرى تاعايىنداعان قولباسشى باسقارادى. اسكەري قاۋىپ-قاتەر ارتقان جاعدايدا جانە سوعىس كەزىندە تاراپتاردىڭ اسكەرلەرى مەن قۇرالدارىن وزدەرىنىڭ ۇلتتىق زاڭدارىندا قاراستىرىلعان رەتپەن پايدالانۋ تۋرالى شەشىم قابىلداۋ قۇقىعى قالدىرىلادى.
اۋە شابۋىلىنا قارسى قورعانىسىنىڭ ءبىرىڭعاي وڭىرلىك جۇيەسىنىڭ كوماندالىق پۋنكتى الماتى قالاسىندا ورنالاسادى دەپ شامالانۋدا.
