عالىمدار: الما مەن كوك شاي قاتەرلى ىسىكتىڭ الدىن الادى

استانا. قازاقپارات - عالىمدار الما مەن كوك شايدىڭ قۇرامىنداعى «پوليفەنول» قان تامىرلارىندا ەندوتەليي جاسۋشالارىنىڭ ءوسۋ فاكتورىنىڭ اسەرىن جويۋ ارقىلى وبىر مەن اتەروسكلەروز اۋرۋلارىن پايدا بولدىرمايتىنىن انىقتادى، دەپ جازادى روسبالت.

«قان تامىرلارى ەندوتەلييىنىڭ ءوسۋ فاكتورى» دەپ اتالاتىن اقۋىز قان تامىرلارى جۇيەسىندە نەمەسە ۇرىقتىڭ ەمبريوندىق دامۋى بارىسىندا جاڭا قان تامىرلارىنىڭ ءوسۋىن باقىلايدى. اقۋىزدىڭ نەگىزگى قىزمەتى - جاراقات العاندا نەمەسە قان تامىرلارىنىڭ قىزمەتى توقتاعاندا اعزادا جاڭا قان تامىرلارىن ءتۇزۋ، زاقىمدانعان بۇلشىق ەتتەردى قالپىنا كەلتىرۋ. الايدا اقۋىزدىڭ جوعارى بەلسەندىلىگى، مىسالى، قاتەرلى ىسىكتىڭ دامۋى سياقتى اۋىر دەرتتەرگە اكەلۋى مۇمكىن.

عالىمدار كوك شاي مەن المانىڭ قۇرامىندا بولاتىن پوليفەنول قان تامىرلارى ەندوتەلييىنىڭ ءوسۋ فاكتورلارىنىڭ بەلسەندىلىگىن تومەندەتەتىنىن انىقتادى. بۇدان باسقا، بۇل انتيوكسيدانتتار قان تامىرلارىن كەڭەيتىپ، ولاردىڭ بىتەلۋى مەن زاقىمدانۋىنىڭ الدىن الادى.