قىزىلوردادا مۇگەدەك جانداردىڭ مۇددەسىن قورعايتىن فورۋم ءوتتى

قىزىلوردا. قازاقپارات - بۇگىن قىزىلوردادا «مۇگەدەكتەرگە ارنالعان كەدەرگىسىز ورتا قالىپتاستىرۋ» فورۋمى ءوتتى، دەپ حابارلادى وبلىستىق اكىمدىكتىڭ باسپا ءسوز قىزمەتىنەن.

فورۋمدا مۇگەدەكتەردىڭ ءومىر ءسۇرۋ ساپاسىن جاقسارتۋ جانە قۇقىقتارىن قامتاماسىز ەتۋ بويىنشا ماسەلەلەر تالقىلاندى.

بۇگىندە جالپى وبلىس بويىنشا 26 مىڭنان استام مۇگەدەك بار. ولاردىڭ ءومىرىن جەڭىلدەتۋ ماقساتىندا قابىلدانعان «جول كارتاسى» بويىنشا ەكى جىلدا 8,1 ميلليارد تەڭگە قارجى ءبولىندى. مۇمكىندىگى شەكتەۋلى جاندار وزدەرىن وزگەدەن كەم سەزىنبەۋى ءۇشىن الەۋمەتتىك ماسەلەسى دۇرىس بولۋى قاجەت.

بۇل باعىتتا ايماقتا اۋقىمدى جۇمىستار اتقارىلىپ جاتىر. ماسەلەن، قازىر وبلىستىڭ بارلىق اۋدانىندا «الەۋمەتتىك تاكسي» قىزمەت ەتەدى. سونداي-اق،  قىزىلورداعا جاڭادان اكەلىنگەن 20 قوعامدىق اۆتوبۋستا مۇگەدەكتەردىڭ ءمىنىپ- تۇسۋىنە جاعداي جاسالعان.

الداعى ۋاقىتتا وسىنداي 100 اۆتوبۋس الىنادى. وتكەن جىلى مۇگەدەكتەرگە ارنالعان 7 اۋلا كلۋبى اشىلسا، بۇل يگى ىستەر بيىل جالعاسىن تاۋىپ وسىنداي اۋلا كلۋبتارى قازالى، جالاعاش اۋداندارىندا دا اشىلدى.

جول كارتاسىنىڭ اياسىندا مۇگەدەكتەردى وڭالتۋعا، ولارعا الەۋمەتتىك قولداۋ كورسەتۋگە، ەمدەۋ- ساۋىقتىرۋعا جانە مۇگەدەكتەر اربالارىمەن، بالداقتارمەن بارلىق قاجەتتى قۇرالدارمەن قامتاماسىز ەتۋ ءۇشىن 2015 -جىلعا وبلىستىق بيۋدجەت ەسەبىنەن 256 ميلليون تەڭگە ءبولىندى. سونداي-اق، بىلتىر 470 مۇمكىندىگى شەكتەۋلى جان تۇراقتى جۇمىسپەن قامتىلدى.

«جۇمىسپەن قامتۋ - 2020» باعدارلاماسى شەڭبەرىندە 45 مۇگەدەك 90 ميلليون تەڭگەدەن استام قارجى الىپ، ءوز كاسىپتەرىن باستادى. تالسۋات ەلدى مەكەنىندە ورنالاسقان مۇگەدەكتەرگە ارنالعان وڭالتۋ ورتالىعىندا 1205 مۇمكىندىگى شەكتەۋلى ازامات مەن قارتتارعا ارناۋلى الەۋمەتتىك قىزمەتتەر كورسەتىلدى.

فورۋمدا «قازاقستاندىق مۇگەدەكتەر كونفەدەراتسياسى» ر ق ك ءتورايىمى جانات وماربەكوۆا مۇمكىندىگى شەكتەۋلى جانداردىڭ تۇرعىن ۇيلەرگە، ءبىلىم بەرۋ، دەنساۋلىق ساقتاۋ، مادەني جانە سپورتتىق نىساندارعا كىرىپ- شىعۋ مۇمكىندىگىنە، جاڭادان سالىنىپ جاتقان نىسانداردا مۇگەدەكتەرگە ارنالعان پاندۋستار سالىنۋىن قاداعالاۋ كەرەكتىگىنە توقتالدى.

مۇمكىندىگى شەكتەۋلى جاندار ءوز كەزەگىندە تولعاندىرعان ماسەلەلەرى توڭىرەگىندە وي ءبولىستى. فورۋم سوڭىندا مۇگەدەكتەر ءۇشىن كەدەرگىسىز ورتا قالىپتاستىرۋ I فورۋمىنىڭ ۇندەۋى قابىلداندى. مۇمكىندىگى شەكتەۋلى جاندارداردىڭ قولونەر بۇيىمدارىنىڭ كورمەسى ۇيىمداستىرىلدى.

اۆتور: ەلۋباي اۋەزوۆ