پۋتين اسكەريدەن ايەلىنىڭ ءيت اسىراۋىنا رۇقسات بەرۋىن سۇرادى
تىكەلەي ترانسلياتسيانى Tengrinews.TV جۇرگىزدى.
«تىكەلەي جەلى» بارىسىندا جۇرگىزۋشى ەلەنا ەسىمدى تانىسىنىڭ حاتىن وقىدى. ايەل قۇربىسىنىڭ جاقىندا 40 جاسقا تولاتىنىن جازعان. ول بۇرىننان بەرى ءيت اسىراۋدى ارمانداپ ءجۇر ەكەن، ءبىراق ونىڭ كۇيەۋى، وتستاۆكاداعى اسكەري ادام ۇيدە جانۋار اسىراۋعا رۇقسات بەرمەگەن.
سونىمەن قاتار، ايەلگە ءيتتى تانىستارى سىيلايىن دەپ وتىرعان كورىنەدى. ول پۋتيننەن تىكەلەي ەفير ارقىلى اسكەري كۇيەۋىنە بىلاي دەپ ايتۋىن وتىنگەن: «بوريس، سەنىكى دۇرىس ەمەس، ايەلىڭە ءيت اسىراۋعا رۇقسات بەر».
رەسەي پرەزيدەنتى، باس اسكەري قولباسشى رەتىندە دە بوريسكە بۇيرىق بەرە المايتىنىن جەتكىزدى. پۋتين بىرىگىپ جوسپار قۇرىپ، ارەكەت ەتۋدى ۇسىندى. «مىسالى، ءسىز بەن مەن بىرگە - مەن جانە ءسىز - بوريستەن ايەلىنە رۇقسات ەتۋىن وتىنە الامىز. ال ەلەنانىڭ بىلاي دەۋىنە بولادى: «جوق، ماعان ءيتتىڭ قاجەتى جوق، سەن قالاي دەسەڭ سولاي بولادى». «وسىدان كەيىن ول ايەلىنە ءيت ەمەس ءپىل سىيلايتىنىنا سەنىمدىمىن، اسىرەسە ەگەر ول بۇل ءسوزدى ىڭعايلى ۋاقىتتا، ىڭعايلى جەردە ايتسا. مۇمكىن تون اپەرۋگە دە ۋادە بەرىپ قالار»، - دەدى ر ف باسشىسى.
سونىمەن قاتار، پۋتين تىكەلەي ەفير ارقىلى ەر ادامنان ايەلىنە جاقسىلىق جاساۋىن ءوتىندى. «بوريس، وتىنەمىن، مەيىرىمدى بولشى، ايەلىڭە ءيت ساتىپ الۋعا رۇقسات بەرشى، بۇل نارسە وتباسىن بەرىك ەتە تۇسەدى»، - دەدى پرەزيدەنت وتستاۆكاداعى پولكوۆنيككە.
بۇعان دەيىن پۋتين بۇدان دا سالماقتى ماسەلەنى قوزعاعان بولاتىن - ۋكرايناداعى جاعداي. ول ۋكراينا كوشباسشىسى پەتر پوروشەنكونىڭ دونباستى قايتارىپ الۋ تۋرالى ۇسىنىس جاساماعانىن ايتتى.
پۋتيننىڭ ايتۋىنشا، ول ارىپتەسىمەن دونباستىڭ ەكونوميكاسى مەن الەۋمەتتىك سالاسىن جانداندىرۋعا قاتىستى ماسەلەلەردى تالقىلادى. سونىمەن قاتار، پۋتين رەسەيدىڭ دونباستاعى جاعدايعا قاتىستى ءوز پوزيتسياسىن تىقپالاپ، ارالاسايىن دەپ وتىرماعانىن، ءبىراق ءوز پىكىرىن جەتكىزە الاتىنىن ايتتى.
