تۇركيا پرەزيدەنتى نازاربايەۆتى «تۇركى الەمىنىڭ اقساقالى» دەپ اتادى
«قۇرمەتتى پرەزيدەنت، قۇرمەتتى باۋىرىم نۇرسۇلتان نازاربايەۆ، - دەپ باستادى ءوز ءسوزىن كەلىسسوزدەردىڭ قورىتىندىسىن جاساعان ەردوعان. - وتكەن جىلى تۇركيا پرەزيدەنتىنىڭ يناۋگۋراتسياسىندا ءسىز ءوزىڭىز كەلىپ قاتىستىڭىز جانە سوندىقتان بىرگە بولعانىڭىز ءۇشىن مەن العىس بىلدىرگىم كەلەدى. مەن مۇنى بىلاي باعالايمىن: تۇركى الەمىنىڭ اقساقالى ءبىزدىڭ دوستىعىمىزعا جانە ەكىجاقتى قارىم- قاتىناسىمىزعا، سونىمەن قاتار ءبىزدىڭ ارىپتەستىگىمىزگە ەرەكشە نازار اۋدارادى».
ول، سونىمەن قاتار، ءۇش جىل وتكەننەن كەيىن تاعى دا ءوز اتا-بابالارىنىڭ وتانىندا ەكەنىن، ەندىگىدە پرەزيدەنت رەتىندە باقىتتى ەكەنىن اتاپ ءوتتى.
«بۇگىندە اينالىمىزدا قاۋىپ بار. قاۋىپسىزدىكتىڭ، تۇراقتىلىق پەن ءال-اۋقاتتىڭ سيمۆولى سانالاتىن تۇركيا مەن قازاقستان مىندەتتى تۇردە ارىپتەستىكتە جۇمىس ىستەۋى كەرەك. دوستىق قيىن كەزەڭدەردە كورىنەدى، سوندىقتان دا ءبىز ستراتەگيالىق ارىپتەستىككە مۇقتاج قازاقستانداعى باۋىرلارىمىزبەن بىرگە بولامىز»، - دەدى ەردوعان.
تۇركيا پرەزيدەنتى ساپارىنىڭ بارىسىندا تۇركىستان قالاسىنا بارۋدى جوسپارلاپ وتىر. «ەرتەڭ ءبىزدىڭ ورتاق مادەنيەتىمىزدىڭ، قۇندىلىعىمىزدىڭ رۋح بەرۋشىمىز قوجا احمەت ياسساۋي كەسەنەسىنە بارامىز. ءبىز ەرتەڭ ونىڭ الدىندا تۇرىك حالقىنىڭ سالەمىن جولدايمىز»، - دەدى ول.
سونىمەن قاتار، ەردوعان 26 -ساۋىرگە بەلگىلەنگەن پرەزيدەنتتىك سايلاۋدىڭ تىنىش جاعدايدا ءوتۋىن، ونىڭ قازاقستان حالقىنىڭ يگىلىگىنە شەشىلۋىن تىلەدى. «اسىرەسە ەل كوشباسشىسىنىڭ، قازىر جاڭا قازاقستاننىڭ ساۋلەتشىسى سانالاتىن قۇرمەتتى نازاربايەۆتىڭ ءرولىن اتاپ وتكىم كەلەدى، وعان سايلاۋدا ساتتىلىك تىلەيمىن»، - دەدى تۇركيا پرەزيدەنتى.
