ۇلى وتان سوعىسىنداعى قازاقستاندىقتاردىڭ ەرلىگى جايىندا كىتاپ شىعادى
بۇل تۋرالى بۇگىن و ك ق- دە وتكەن بريفينگتە مەملەكەت تاريحى ينستيتۋتىنىڭ ديرەكتورى بۇركىتباي اياعان ءمالىم ەتتى.
«ۇلى وتان سوعىسىنا قاتىستى «ابىروي مەن پارىز» قازاق جانە ورىس تىلىندە كىتاپ شىعاردىق. قازىر ونى باسپاحاناعا جىبەردىك. ول 600 بەتتەن اسادى. ءبىزدىڭ عالىمدار وسى كىتاپتى جازۋ بارىسىندا رەسەي، ۋكراينا، بەلارۋس مۇراعاتتارىندا جۇمىس ىستەپ كەلدى.
ەلشىلىكتەرمەن، سول ەلدەردىڭ عالىمدارىمەن جاقسى قارىم-قاتىناستا بولىپ، ءبىزدىڭ حالقىمىزدىڭ ەكىنشى دۇنيەجۇزىلىك سوعىسىنداعى جەڭىسكە قوسقان ۇلەسى، قاسىرەتى مەن قيىنشىلىقتارىن كورسەتە الدىق دەگەن ويدامىن. سەبەبى، كوپتەگەن تىڭ سۋرەتتەر مەن قۇجاتتار تابىلدى»، - دەدى ول.
ونىڭ سوزىنە قاراعاندا، كىتاپتىڭ ەلەكتروندىق نۇسقاسى ينستيتۋتتىڭ پورتالىندا جاريالانادى جانە ءاردايىم تولىقتىرىلىپ وتىرماق.
اۆتور: جاسۇلان جولدىبايەۆ
