ابايدى الەمگە ناسيحاتتاۋدىڭ جاڭا فورماتىنا كوشۋگە ءتيىسپىز - د. مىڭباي
«بيىلعى 2015 -جىل مەرەيلى مەرەكەلەر، تاريحي تۇلعالاردىڭ مەرەيتويلار جىلى بولىپ وتىر. قازاق حاندىعىنىڭ قۇرىلعانىنا 550 جىل، ش. ءۋاليحانوۆتىڭ تۋعانىنا 180 جىل، ابايدىڭ تۋعانىنا 170 جىل، ق ح ا مەن كونستيتۋتسيامىزعا 20 جىل تولىپ وتىر. سونىڭ ىشىندە كەمەڭگەر ويشىل اباي قۇنانباي ۇلىنىڭ مۇراسىنا ارنالعان بۇگىنگى كونفەرەنسيانى وسى كوپ تويلاردىڭ بەتاشارى دەسەك تە بولادى»، - دەدى جيىندى اشقان ۇلتتىق مۋزەي ديروكتورى دارقان مىڭباي.
«جاڭا ءداۋىر - ابايدى ۇرپاق پەن الەمگە تانىتۋدىڭ جاڭا تاسىلدەرىن دە تالاپ ەتەدى.
ءبىر كەزدەرى مادەني ىقپالداستىقتىڭ جولى كوركەم اۋدارما عانا بولسا، قازىر ونىڭ ءارتۇرلى تارام- تارام تاسىلدەرى بار. ماسەلەن، سوڭعى جىلدارى اباي شىعارمالارى پولياك، يتاليان، تۇرىك جانە تاعى باسقا دا تىلدەرگە اۋدارىلدى. ەندى ۇلى اقىن تۋرالى تانىمدىق دەرەكتى فيلمدەردى الەم جۇرتشىلىعىنا جەتكىزۋىمىز كەرەك. بۇرىن دا، قازىر دە دانىشپان ابايدى الەمگە تانىتقان م. اۋەزوۆتىڭ «اباي جولى» ەكەنى بەلگىلى. ەندى وسى دۇنيەنى قوسا العاندا اباي تۋرالى درامالىق تۋىندىلاردى، شىعارمالاردى بۇگىنگى تەحنولوگيانى پايدالانا وتىرىپ، ناسيحاتتاۋ ماڭىزدى»، - دەدى د. مىڭباي.
شاراعا بەلگىلى ابايتانۋشىلار، عالىمدار، قوعام قايراتكەرلەرى جانە استانا قالاسىنداعى ءبىلىم مەكەمەلەرىنىڭ ۇستازدارى مەن وقۋشىلارى قاتىستى.
كونفەرەنسيا بارىسىندا ابايدىڭ العاشقى شىققان ەڭبەكتەرى، شەت تىلدەرگە اۋدارىلعان تۋىندىلارى مەن اقىن جايلى ارنايى دايىندالعان اۋديو-بەينە روليكتەر جانە ۇلتتىق مۋزەي قورىنداعى اباي پورترەتتەرىنەن شاعىن كورمە ۇسىنىلدى.
اۆتور: قانات مامەتقازى ۇلى
