الەمنىڭ ۇزدىك اۋىر اتلەتتەرى استانادا ماراپاتتالادى
حالىقارالىق اۋىر اتلەتيكا فەدەراتسياسىنىڭ رەسمي سايتىندا ۇيىمداستىرعان داۋىس بەرۋدىڭ قورىتىندىسى بويىنشا، 2014-جىلى ەرلەر اراسىندا وليمپيادا ويىندارىنىڭ ەكى دۇركىن چەمپيونى، وتانداسىمىز يليا يلين، ال قىز-كەلىنشەكتەر اراسىندا رەسەيلىك زىلتەمىرشى تاتيانا كاشيرينا «Worldweightlifting» جۋرنالىنىڭ باس رەداكتورى يەنو بوسكوۆيچ اتىنداعى سىيلىقتىڭ يەگەرى، ياعني الەمنىڭ ۇزدىك اۋىر اتلەتتەرى اتانعان بولاتىن.
قازاقستاننىڭ اۋىر اتلەتيكا فەدەراتسياسى تاراتقان مالىمەت بويىنشا، الەمنىڭ ۇزدىك اۋىر اتلەتتەرىن ماراپاتتاۋ ءراسىمى 24- ءساۋىر كۇنى استانا قالاسىندا وتەتىن بولىپتى. وعان حالىقارالىق اۋىر اتلەتيكا فەدەراتسياسىنىڭ پرەزيدەنتى توماش ايان، فەدەراتسياسىنىڭ ۆيتسە- پرەزيدەنتى نيكۋ ۆلاد، «Worldweightlifting» جۋرنالىنىڭ ۇجىمى جانە قازاقستان اۋىر اتلەتيكا فەدەراتسياسىنىڭ پرەزيدەنتى جانات تۇسىپبەكوۆ قاتىسادى. ماراپاتتاۋ راسىمىندە جەڭىمپازدارعا ەستەلىك سىيلىقتار مەن اقشالاي سىياقى تابىستالادى.
يليا يلين - الماتىدا وتكەن الەم بىرىنشىلىگىنە 105 كەلى سالماقتا سىنعا ءتۇسىپ، باس جۇلدە العان ەدى. ول سايىس بارىسىندا تەك ءبىرىنشى ورىن الىپ قانا قويماي، سەرپە كوتەرۋدە 242 كەلىنى باعىندىرىپ، الەم رەكوردىن جاڭارتتى.
تاتيانا كاشيرينا دا 2014-جىلعى الەم بىرىنشىلىگىندە التىن جۇلدە الدى. قىز-كەلىنشەكتەر اراسىندا ەڭ اۋىر سالماقتا سىنعا تۇسكەن رەسەيلىك زىلتەمىرشى الماتى تورىندە بەس بىردەي رەكورد ورناتتى.
اۆتور: ۋاليحان قوسانباي
