قاراعاندى وبلىسىندا تۇرعىنداردى سۋ تاسقىنىنان قۇتقارۋ جۇمىستارى ۇزدىكسىز جۇرگىزىلىپ جاتىر - فوتو

استانا. قازاقپارات - قاراعاندى وبلىسىندا اپاتتان قۇتقارۋ جۇمىستارى ۇزدىكسىز جۇرگىزىلۋدە. وبلىستا تۇرعىندارعا زاردابى تيمەس ءۇشىن، قۇتقارۋشىلار تاۋلىك بويى سۋ تاسقىنى جاعدايىن باقىلاپ، تالداۋلار، مونيتورنيگتەر جاساۋدا.

قۇتقارۋ قىزمەتتەرى جەدەل رەجىمدە الدارىنا قويىلعان ادامداردى قۇتقارۋ مىندەتىن ورىنداۋدا، دەپ حابارلانعان قاراعاندى وبلىسىنىڭ توتەنشە جاعدايلار دەپارتامەنتىنىڭ سايتىندا.

اباي اۋدانىنىڭ قاراقوعا ەلدى مەكەنىنە ەرىگەن قار سۋىنىڭ جايىلۋىنا بايلانىستى، 2 ءۇيدى سۋ باسىپ، 25 ادام كوشىرىلدى. جەرگىلىكتى جەردە قۇرامىندا 86 ادام مەن 4 تەحنيكا قامتىلعان وڭتۇستىك قازاقستان وبلىسى قۇتقارۋ قىزمەتىنىڭ قۇتقارۋشىلارىنىڭ، اباي اۋدانى ت ج ءبولىمىنىڭ جانە كوممۋنالدى قىزمەت كۇشىنىڭ كومەگىمەن بوگەتتەردى بەكىتۋ، قۇم تولتىرىلعان قاپتاردى قويۋ بويىنشا جۇمىستار جۇرگىزىلۋدە.

بۇقار جىراۋ اۋدانى قاراجار ەلدى مەكەنىندە قورعانىس بوگەتىن سالۋ بويىنشا قاراعاندى وبلىسى ت ج د ءورت ءسوندىرۋ جانە اپاتتان قۇتقارۋ قىزمەتىنىڭ، الماتى وبلىسى ت ج د قۇرىلىمدارىنىڭ، ۇلتتىق ۇلان پولكىنىڭ 53 ادامى مەن 5 تەحنيكاسى جۇمىس اتقارۋدا. سونىمەن قاتار ۆەتستانسا مەن جانۇيالىق دارىگەرلىك امبۋلاتوريا جۇمىس جاساپ جاتىر.

ع. مۇستافين كەنتىندە بۇگىنگى كۇنى 80 ءۇي سۋ استىندا قالىپ وتىر. بۇرىنىراق تۇرعىنداردى قاۋىپسىز جەرگە كوشىرۋ جۇزەگە اسىرىلعان بولاتىن. وقيعا ورنىندا 501 ادام مەن 8 تەحنيكا، ءجۇزۋ قۇرالدارى بار قاراعاندى وبلىسى ت ج دەپارتامەنتى قۇرىلىمدارىنىڭ، ازاماتتىق قورعانىس پولكىنىڭ، ارنايى دەن قويۋ جاساعىنىڭ جانە ىشكى ىستەر دەپارتامەنتىنىڭ كۇشتەرى جۇمىس اتقارۋدا. كەنتتەگى سۋ دەڭگەيى كوتەرىلمەي، تومەندەي تۇسۋدە.

سونىمەن قاتار قۇتقارۋ جانە قالپىنا كەلتىرۋ جۇمىستارى تاسساۋىت، قانتاي، قاراوي ەلدى مەكەندەرىندە جانە كيەۆكا كەنتىندە جالعاسىن تابۋدا. بۇل جەردە جاعالاۋدى بەكىتۋ، قۇم تولتىرىلعان قاپتاردى قويۋ جۇمىستارى جۇرگىزىلۋدە.

اقتوعاي اۋدانىنىڭ قاراسۋ ەلدى مەكەنىندە توقىراۋىن وزەنىنىڭ سۋ دەڭگەيىنىڭ كوتەرىلۋىنە بايلانىستى 30 ادام قاۋىپسىز جەرگە شىعارىلسا، ونىڭ ىشىندە 10 ى بالا. مۇندا قۇرامىندا 26 ادامى مەن 7 تەحنيكا، 1 موتورلى جانە 2 رەزەڭكە قايىعى بار بالقاش قالاسى ت ج باسقارماسىنىڭ، اقتوعاي اۋدانى ت ج ءبولىمىنىڭ، ءورت ءسوندىرۋ جانە اپاتتان قۇتقارۋ جۇمىستارى قىزمەتىنىڭ، سۋدا قۇتقارۋ قىزمەتىنىڭ، ىشكى ىستەر ءبولىمىنىڭ كۇشتەرى، سونداي-اق قۇرامىندا 18 ادام مەن 18 تەحنيكاسى بار كوممۋنالدىق قىزمەت جۇمىس اتقارۋدا.

سونىمەن قاتار، اسىرەسە، جەردىڭ تومەنگى بولىگىنە ەرىگەن قار سۋىنىڭ ىعىسىپ اعۋىنا بايلانىستى جاڭاارقا، قارقارالى اۋداندارىنىڭ جولدارىن سۋ شايىپ كەتۋ وقيعاسى ورىن العان. بۇل جەردە جول ۋچاسكەلەرىن نىعايتۋ جۇمىستارى قولعا الىنىپ جاتىر.