بەيجىڭدەگى مەديتسينالىق ۋنيۆەرسيتەتتە قازاقستاندىق ستۋدەنتتەردىڭ قاتارى مول

استانا. قازاقپارات - دۇنيەجۇزىلىك دەنساۋلىق ساقتاۋ ۇيىمىندا رەسمي تانىلعان قىتايدىڭ ءداستۇرلى مەديتسيناسىنىڭ ىشىندە قازاق حالقىنىڭ ەرتەدەن كەلە جاتقان ەم-دومى دا قولدانىلادى.

كەلەشەكتە قازاقستاندا دا حالىقتىق مەديتسينانى ساپالى دەڭگەيگە كوتەرىپ، دامىتامىز، -  دەيدى بەيجىڭدە قىتاي مەديتسيناسىن وقىپ جاتقان قازاقستاندىق ستۋدەنتتەر.

 مىسالى الەم مويىنداعان شىعىس مەديتسيناسى دا سۋىق تيگەندە، قويدىڭ ەتى مەن مايى، سورپاسىن ۇسىنادى. «قوي ەتى - قورعاسىن» دەپ تانيتىن قازاق مۇنى ەجەلدەن بىلگەن. بۇگىندە بەيجىڭدەگى قىتايدىڭ ءداستۇرلى مەديتسيناسى ۋنيۆەرسيتەتىندە 36 قازاقستاندىق ستۋدەنت ءبىلىم الىپ جاتىر. سونىڭ ءبىرى 3- كۋرستاعى اراي كامىلجان قىزى. ول ءوز كۇشىمەن قىتاي ۇكىمەتىنىڭ ستەپەندياسىن ۇتىپ العان، ايتپەسە بۇل وقۋ ورنىندا اقىلى ءبىلىم الۋ وتە قىمبات سانالادى.

اراي شىعىس مەديتسيناسىنىڭ قىر سىرىن جەتىك مەڭگەرگەن سوڭ قازاقستاندا شىنايى ساپالى دەڭگەيدە قىزمەت كورسەتەتىن ورتالىق اشۋدى ارماندايدى. ويتكەنى دارحان دالامىزدا دارىلىك شوپتەر وتە كوپ، ءبىراق قادىرىن بىلە بەرمەيمىز.

اراي كامىلجان قىزى، قىتاي مەديتسيناسى ۋنيۆەرسيتەتىنىڭ 3- كۋرس ستۋدەنتى:

- مىسالى قىزىلميا سياقتى قازاقستاندا نەشە ءتۇرلى ەمدىك دارىلەر بار، ءبىراق ءبىز ولاردىڭ قادىرىن بىلمەيمىز. ولاردى قولدانبايمىز، پايدالانبايمىز. وسىندا وقىپ جاتقان سەبەبىمىزدىڭ دە ءبىرى قىتاي مەديتسيناسىن ۇيرەنە وتىرىپ، ەلگە ورالىپ ءوزىمىزدىڭ قازاق مەديتسيناسىن كوتەرۋ.

قىتاي ءتول مەديتسيناسىن دامىتۋدى 1980 -جىلدارى باستادى ەلدەگى 56 ۇلتتىڭ سونىڭ ىشىندە قازاق، موڭعول، كارىس سياقتى حالىقتاردىڭ ءداستۇرلى مەديتسيناسىن مەملەكەت تاپسىرماسىمەن تەرەڭ زەرتتەدى. ەرتەدەن دارىلىك قاسيەتى بار شوپتەردىڭ شەجىرەلەرى جازىلعان ەڭبەكتەردى جيناقتادى. بۇگىندە قىتايدىڭ ءداستۇرلى ەم- دومىن الەم مويىندايدى. ال پروفەسسور تاو سياويان قازاقتار كوپ جەيتىن قوي ەتىنىڭ دە قاسيەتى ەرتەدەگى جازبالاردا بار دەيدى.

تاو شياۋيان، بەيجىڭ قىتاي مەديتسيناسى اكۋپۋنكتۋرا كافەدراسىنىڭ اعا پروفەسسورى:

- قوي ەتى قىتاي مەديتسيناسىندادا دارىلىك تاعام رەتىندە كەڭىنەن قولدانىلادى، كوبىنە سۋىق ءتيىپ سىرقاتتانعاندارعا ۇسىنىلادى. اياق- قولدىڭ مۇزداۋى كەزىندە اسىرەسە، قىس مەزگىلدەرىندە قوي ەتىن باسقا دا دارىلىك شوپتەرمەن قابىلداۋعا كەڭەس بەرەمىز. قىتايدىڭ حان ديناستياسىندا ءومىر سۇرگەن جاڭ جوڭجيڭ جازبالارىندا قوي سورپاسىنىڭ قاسيەتى تۋرالى ايتىلادى.

ال مۇنى بىلگەن بابامىز بۇرىننان «قوي ەتى قورعاسىن» دەپ كەتكەن. سونىمەن قاتار بۇگىندە قىتايدا «التاي ايماقتىق قازاق مەديتسيناسى كلينيكالىق ەمحاناسى» جۇمىس ىستەيدى.

www.24.kz