قازاقستاندا جۇرەك تالماسىنا شالدىعاتىن جاستار كوبەيگەن

استانا. قازاقپارات - ەلىمىزدە جۇرەك- قان تامىرلارى اۋرۋلارى جاسارىپ بارادى.

ەلوردالىق كارديولوگتار وسىلاي دەپ دابىل قاعۋدا. سوڭعى كەزدە جۇرەك تالماسىنا شالدىعاتىن جاستار كوبەيىپ كەتكەن.

جۇدىرىقتاي جۇرەكتەگى دەرتتى اسقىندىرماۋ ءۇشىن استاناداعى ۇلتتىق عىلىمي مەديتسينالىق ورتالىعىنىڭ ماماندارى ەمدەۋدىڭ زاماناۋي تاسىلدەرىن قولدانا باستادى.

سونداي-اق يتاليالىق دارىگەرلەرمەن تاجىريبە الماسىپ، شەبەرلىك ءدارىسىن تىڭدادى. جۇرەك- قان تامىرلارى اۋرۋلارىنا وپەراتسيا جاسالىپ جاتىر. وندا جۇرەك تامىرلارىنا وزدىگىنەن ەرىپ كەتەتىن قۇرىلعى ورناتىلۋدا.

بۇل ءبىر- ەكى جىلدان كەيىن وزدىگىنەن ەرىپ، تامىرمەن بىتە قايناسىپ كەتەدى ەكەن. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنە سۇيەنسەك، جۇرەك- قان تامىرلارى اۋرۋلارىنان بولاتىن ءولىم-ءجىتىم الەمدە ءبىرىنشى ورىندا تۇر. ءبىزدىڭ ەلدەگى ستاتيستيكا دا كوڭىل كونشىتپەيدى.

دەندەگەن دەرتتىڭ الدىن الۋ ءۇشىن وتاندىق ماماندار تىڭ ءتاسىلدى قولدانا باستادى. ياعني دەنەگە تىلىك سالماي، قان تامىرىنا تەز ىدىرايتىن يمپلانت ورناتادى. سول ارقىلى جۇرەككە اينالاتىن قان اعىنىن قالپىنا كەلتىرەدى.

بۇگىنگە دەيىن وسى ورتالىقتا 400 دەن استام ناۋقاسقا وسىنداي وپەراتسيا جاسالعان.

الەكساندر حۋسنۋلين، ەمدەلۋشى:

- ماعان كەشە عانا وپەراتسيا جاسادى. جۇرەگىمدەگى دەرتتەن ايىققانداي بولدىم. وسىعان دەيىن ينفاركت الىپ، مازام كەتكەن ەدى. ءقازىر ءوزىمدى وتە جاقسى سەزىنەمىن.

بەعىلان ستامبول ۇلى، ۇلتتىق عىلىمي مەديتسينالىق ورتالىقتىڭ ءبولىم مەڭگەرۋشىسى:

- تامىر بىتەلگەننەن كەيىن جۇرەكتىڭ بۇلشىق ەتىندە قان جەتىسپەۋشىلىك بولادى. جۇرەكتە ينفاركت بولعاننان كەيىن ونىڭ جۇمىسى ناشارلايدى. جۇرەك تامىرلارىن اشقاننان كەيىن قىزمەتى جاقسارادى. قاتەرلى ىسىكتىڭ الدىن الادى.

تارىلعان تامىردى كەڭەيتەتىن ستەند، ياعني تامىردا وزدىگىنەن ەريتىن قۇرىلعىنى ورناتۋ ءادىسى الەمدىك تاجىريبەدە بۇرىننان بار. وسى ءتاسىلدى العاشقىلاردىڭ ءبىرى بولىپ پايدالانعان يتاليا دارىگەرلەرى بۇگىن ءوز تاجىريبەسىمەن ءبولىستى.

بەرنارد رەيمەرس، كارديوحيرۋرگ (يتاليا) :

- مۇنداعى ماماندار ءوزىنىڭ ءبىلىمى مەن بىلىكتىلىگىن ۇنەمى ارتتىرىپ وتىراتىندىعىن بىلەمىن. سونداي-اق قازاقستاندىق دارىگەرلەر ت م د اۋماعىندا العاشقىلاردىڭ ءبىرى بولىپ، وزدىگىنەن ىدىرايتىن تامىر قاڭقاسىنىڭ يمپلانتاتسياسىن اسكە اسىرا باستادى. بۇعان دەيىن تاجىريبە جۇزىندە بولسا، قازىر وسىنداي وپەراتسيالار جوعارى دەڭگەيدە جاسالۋدا.

«تامىر قاڭقاسى يمپلانتاتسياسى -  جۇرەگى سىر بەرگەن جاستاردى ەمدەۋدە تاپتىرماس شيپا»، - دەيدى ماماندار. سەبەبى وسى وپەراتسيادان كەيىن جۇرەك تالماسى قايتالانبايدى ەكەن.

ساۋلە ابسەيىتوۆا، جوعارعى ساناتتى كارديولوگ دارىگەر:

- الدىن الا ينفاركتىڭ ءبىرىنشى ساعاتىندا كەلسە، وندا وسى قۇرىلعى ارقىلى ينفاركتى توقتاتۋعا بولادى. ءسويتىپ ودان كەيىنگى مۇگەدەكتىكتى، ءولىم جاعدايىن ازايتادى.

مامانداردىڭ ايتۋىنشا، ەلىمىزدە ەنگىزىلىپ جاتقان زاماناۋي تەحنولوگيالار مەن تىڭ ادىستەردىڭ ارقاسىندا جۇرەك- قان تامىرلارى اۋرۋلارى ەداۋىر ازايعان. مىسالى، 2010 -جىلمەن سالىستىرعاندا جۇرەك تالماسىنان بولاتىن ءولىم- ءجىتىم ەكى ەسەگە كەمىگەن.

www.24.kz