كوكپار ەرەجەسى حالىقارالىق جۇيەگە كەلتىرىلدى

استانا. قازاقپارات - كوكپاردى ەندى سەركەمەن ەمەس، ارنايى ماكەتپەن ويناۋ كەرەك.

بۇعان قوسا جىلقىنى بۇرىنعىداي قاتتى قامشىلاۋعا بولمايدى.

حالىقارالىق ويىندار قاتارىنا ەنگەن ۇلتتىق سپورتىمىزعا قازىر وسىنداي ەرەجەلەر قوسىلعان. وتاندىق ماماندار ەندى ونى رەسمي تۇردە پاتەنتتەپ، الەمدىك دەڭگەيگە جەتكىزۋدى كوزدەپ وتىر.

ارينە ءبارى ءبىز ويلاعانداي وڭاي ەمەسى انىق.

ءبىراق ماقسات -  ايقىن، قادام -  نىق. قازىر بۇل جاي جىلقىلاردىڭ كەسكىنى. ال بىرەر جىل وتكەننەن كەيىن استارىنا اتى-ءجونى، ونەر كورسەتكەن جىلدارى جازىلعان ارناۋلى مۇسىنگە اينالادى. يەلەرى دە قۇر قالماق ەمەس.

شەبەرلەر وسى ءوز تۇلپارلارىنىڭ ۇستىنە وتىرعىزىپ، ەسىمدەرىن قوسا جازاتىن شىعار. سىرتتاي قاراعاندا قيال- عاجايىپ اڭگىمە سياقتى. ءبىراق بىلە بىلسەك، قازاقتىڭ كوكپارى جايلى قازىر ت م د ەلدەرى، ورتا ازيا، قالا بەردى پارسى شىعاناعىنا دەيىن ايتا باستاعان.

بۇل نەنى بىلدىرەدى؟ ياعني جاقىن ارالىقتا حالىقارالىق ويىننىڭ وسىنداي ءوز باتىرلارى پايدا بولىپ، ءوز اۋديتورياسى جاساقتالادى. باسقا، باسقا ءدال وسى كوكپاردان حالىقارالىق چەمپيوناتتار ءوتىپ، بەدەلى جەر جارادى دەپ ەشكىم ويلاماعانى انىق.

وتاندىق مامانداردىڭ باتىل باستاماسىمەن «قۇرلىقتىق دەڭگەيدەگى سپورت» دەگەن اتاق بۇيىردى. ياعني بىلتىر وتكەن تۇڭعىش ازيا چەمپيوناتىنا 8 ەلدىڭ قۇراماسى قاتىسىپ، استانا يپپودرومىنىڭ شاڭىن شىعاردى. ەندى وسى ابىرويعا تولىق لايىق بولۋ ءۇشىن ەرەجەسىنە بىرنەشە وزگەرىس ەنگىزىلدى.

ءبىرىنشىسى، بۇرىنعىداي ەشكى سويىپ، ونى دوپشا لاقتىرۋعا بولمايدى. حالىقارالىق تالاپتار بويىنشا ماكەتى جاسالعان. الايدا ساقا سپورتشىلارىمىز وعان ءالى ۇيرەنە الماي جاتقاندارىنان ايتادى. كوكپار تارتقاندارعا ەندى اتتى دا قاتتى قامشىلاۋعا بولمايدى.

اسىرەسە ءورىم ىشىنە قورعاسىن سالعان قامشىنى قولدانۋعا تۇبەگەيلى شەكتەۋ قويىلدى. سەركە ۇستاعان كوكپارشىنى بۇيىردەن سوعۋعا دا تىيىم سالىندى. مۇنىڭ ءبارى -  قاۋىپسىزدىك شارالارى. كوكپاردىڭ كەلەشەكتە فۋتبول مەن حوككەي سياقتى مىڭداعان جانكۇيەر جيناپ، اۋىزدان تۇسپەيتىن سپورتقا اينالۋى ءۇشىن وسىنداي قادامدار مىندەتتى تۇردە جاسالۋ كەرەك دەيدى ماماندار.

بىرەگەي باستامالار مۇنىمەن بىتپەيدى. قازاقستان كوكپاردان ەكى جىلدا ءبىر وتەتىن قۇرلىقتىق چەمپيوناتتىڭ ىرگەسىن قالادى. سونىڭ ءساتتى جالعاسىن تابۋىن قاداعالايدى.

بۇدان بولەك وتاندىق ماماندار الدىندا ۇلتتىق سپورتىمىزدى پاتەنتتەپ، ونى حالىقارالىق، قالا بەردى الەمدىك دەڭگەيدى وتكىزە الاتىنداي يپپودرومدار سالۋ ماقساتى بار.

www.24.kz