استانانىڭ اق داستارقانى: پرەزيدەنتتەرگە دايارلاناتىن تاعام تۇرلەرى - فوتو

استانا. قازاقپارات - قازاق شاڭىراعىنا قوناق كەلە قالسا، بار جىلى- جۇمساعىن الدىنا توساتىنى انىق.

مەملەكەتتىك دەڭگەيدە دە سول، ەلىمىزگە ساپارلاپ كەلەتىن ءاربىر جوعارى لاۋازىمدى تۇلعا داستارقانىمىزدان ءدام تاتپاي، قازاق اسحاناسىنىڭ سىرىن «سۇراماي» كەتپەيدى.

ارينە، پرەزيدەنتتەرگە قانداي اس ازىرلەنەدى ەكەن، بولماسا، ولاردىڭ اسپازشىلارى كىم ەكەن دەگەن ساۋال اركىمدى- اق قىزىقتىرارى ءسوزسىز.

مىنە، بۇگىن تۇساۋكەسەرى وتكەن «استانانىڭ اق داستارقانى» اتتى جاڭا فوتوالبومدى كىتاپتى الىپ وقىساڭىز، وسى سۇراقتاردىڭ بارىنە جاۋاپ تاباسىز. ءارى، مەملەكەت باسشىلارى ءوزىمىز ويلاعانداي «الەمدە جوق تاماقتارمەن» ەمەس، قاراپايىم، قولجەتىمدى ازىق-تۇلىكتەن دايارلاناتىن جانە رەتسەپتىسىن بىلسەڭىز، ءوزىمىز دە دايىنداي الاتىن تاماق تۇرلەرىن تۇتىناتىنىنا كوز جەتكىزەسىز.

جالپى، «استانانىڭ اق داستارقانى» اتتى كىتاپ اقوردانىڭ مارتەبەلى اسحاناسى تۋرالى كوپ دەرەك بەرەتىن تۋىندى. كىتاپ قازاق، ورىس جانە اعىلشىن تىلدەرىندە جارىققا شىعىپ وتىر.

«بۇل كىتاپقا كوپ ەڭبەك سىڭىردىك. اقورداداعى بۇكىل اسپازشىلاردىڭ، جالپى اسحاناداعى بارلىق قىزمەتكەردىڭ تەرى توگىلدى.

كىتاپتا جازىپ شىققان تاعام تۇرلەرىن وسى ۋاقىتقا دەيىنگى ەڭبەگىمىزدىڭ ەسەبى رەتىندە ۇسىنىپ وتىرمىز دەسەك بولادى. كىتاپقا جازعان تاعام تۇرلەرى ەڭ تاڭداۋلى، ياعني، مەملەكەت باسشىلارى دەڭگەيىندەگى قوناقتارعا ازىرلەنەتىن تاعامدار. جالپى، اقوردانىڭ اسحاناسىندا جاسالاتىن تاعامداردىڭ اراسىندا وتە جوعارى شەبەرلىكتى قاجەت ەتەتىن تاعامدار بار. ياعني، ونداي اس تۇرلەرىن ءپىسىرۋ ءۇشىن بەلگىلى ءبىر تەحنولوگيالاردى، ءادىس- تاسىلدەردى پايدالانۋ كەرەك. ءبىراق، تاعامداردىڭ 70 پايىزىن پىسىرۋگە شىعۋعا بولادى»، - دەيدى كىتاپ اۆتورلارىنىڭ ءبىرى، قازاقستان رەسپۋبليكاسى پرەزيدەنتىنىڭ ءىس باسقارماسى «قاراتوتكەل» رم ك ديرەكتورىنىڭ ورىنباسارى ارتەم كانتسيەۆ.

جالپى، كىتاپ بەس تاراۋدان تۇرادى جانە قالاداعى «مەلومان» ساۋدا جەلىسىنىڭ دۇكەندەرىندە ساتىلادى. كىتاپتىڭ ءبىرىنشى تاراۋىندا حالقىمىزدىڭ عاسىرلاردان بەرى كەلە جاتقان اس دايىنداۋ ءداستۇرى، ەكىنشى تاراۋىندا ءارتۇرلى ەلدەردىڭ، ۇلى ساياساتكەرلەردىڭ «اسحاناسى» تۋرالى، ءۇشىنشى تاراۋدا جوعارى لاۋازىمدى قوناقتارعا اس دايارلاۋداعى قازاقستاننىڭ تاجىريبەسى، ءتورتىنشى تاراۋدا پرەزيدەنتتەردىڭ جاقسى كورەتىن استارى تۋرالى ايتىلا كەلە، قورىتىندى بولىمدە اقوردا اسپازشىلارىنىڭ سۇحباتى بەرىلگەن. كىتاپتىڭ سوڭىندا اقوردانىڭ رەتسەپتەرىن دە وقي الاسىز.

جالپى، اقوردانىڭ اسپازشىلارى ۇنەمى شەت ەلدەرگە بارىپ تاجىريبە الماسىپ، شەبەرلىكتەرىن جەتىلدىرىپ وتىرادى. بىلتىر شەت مەملەكەتتەردەن وقۋدان وتكەن اسپازشىلارى 50 دەن استام جاڭا اس ءتۇرىن ويلاپ تاپسا، 2014 -جىلى اقوردانى اسحاناسى 110 رەسمي قابىلداۋ وتكىزگەن ەكەن.

كەنجەكەي توقتامۇرات، فوتو: باۋىرجان جۋاسبايەۆ

BNews.kz